കോഴിക്കോട്: വനിതകളുടെ കൂട്ടായ്മയ്ക്കായി ലോക വതിനാ ദിനത്തില്‍ ആവശ്യപ്പെടുന്ന സ്ഥലങ്ങളിലേക്ക് യാത്രയൊരുക്കാന്‍ ഒരുങ്ങി കെ.എസ്.ആര്‍.ടി.സി. ഈ മാസം എട്ട് മുതല്‍ 15 വരെയുള്ള ദിവസങ്ങളില്‍ കോഴിക്കോട് ഡിപ്പോയില്‍ നിന്ന് വിവിധ ടൂറിസ്റ്റ് കേന്ദ്രങ്ങളിലേക്ക് വനിതാ യാത്രികര്‍ക്ക് സവാരി പോകാം. കെ.എസ്.ആര്‍.ടി.സി ബജറ്റ് ടൂറിസം സെല്ലാണ് യാത്രകള്‍ ഒരുക്കുന്നത്.

വനിതാ സംഘടനകള്‍ക്കും ഗ്രൂപ്പുകള്‍ക്കുമായാണ് ട്രിപ്പുകള്‍ ക്രമീകരിച്ചിരിക്കുന്നത്. ഇവര്‍ക്ക് മുന്‍കൂട്ടി ബുക്കിംഗ് നടത്താം. നെല്ലിയാമ്പതി, ജാനകിക്കാട്, വയനാട്, മലമ്പുഴ, വണ്ടര്‍ലാ, ഗവി, സൈലന്റ് വാലി, വാഗമണ്‍ തുടങ്ങിയ ജനപ്രിയ വിനോദസഞ്ചാര കേന്ദ്രങ്ങളിലേക്കുളള പാക്കേജുകളാണ് നിലവിലുള്ളത്. ഇതിന് പുറമേയാണ് കൂടുതല്‍ വനിതകള്‍ പുത്തന്‍ സ്ഥലങ്ങളുടെ ആശയങ്ങളുമായി സമീപിച്ചാല്‍ അവിടേക്ക് പ്രത്യേക ട്രിപ്പുകള്‍ സജ്ജീകരിക്കുന്നത്.

ഇത് കൂടാതെ വനിതാദിനത്തില്‍ സ്ത്രീകള്‍ക്കായി വണ്ടര്‍ലാ, ജാനകിക്കാട്, പെരുവണ്ണാമൂഴികരിയാത്തന്‍ പാറ, വാഗമണ്‍, കുമളി സ്പെഷ്യല്‍ ട്രിപ്പുകളുണ്ടാകും. നിരക്കിളവോടെയാണ് എല്ലാ ട്രിപ്പുകളും ഒരുക്കുന്നത്. എട്ടിന് വണ്ടര്‍ലാ വാട്ടര്‍ തീം പാര്‍ക്കിലേക്കുളള യാത്രക്കുള്ള ബുക്കിംഗ് ആരംഭിച്ചു കഴിഞ്ഞു. പ്രവേശന ഫീസും യാത്രാ നിരക്കും ഉള്‍പ്പടെ 1,935 രൂപയാണ് ഒരാള്‍ക്ക് ഈടാക്കുന്നത്. രാവിലെ നാലിന് പുറപ്പെട്ട് വൈകിട്ട് ആറിന് തിരിച്ചെത്തുന്ന രീതിയിലാണ് ഈ യാത്ര ക്രമീകരിച്ചിരിക്കുന്നത്.

ജാനകിക്കാട്, പെരുവണ്ണാമൂഴി, കരിയാത്തന്‍ പാറ എന്നിവിടങ്ങളിലേക്ക് 360 രൂപയാണ് നിരക്ക്. രാവിലെ നാലിന് പുറപ്പെട്ട് വൈകിട്ട് ആറിന് തിരിച്ചെത്തും. വാഗമണ്‍- കുമളി മൂന്ന് ദിവസത്തെ യാത്രക്ക് ഭക്ഷണം, യാത്ര, താമസം ഉള്‍പ്പെടെ 4,430 രൂപയാണ് ഈടാക്കുന്നത്.

ബുക്കിംഗിനായി കെ.എസ്.ആര്‍.ടി.സി ബജറ്റ് ടൂറിസം സെല്ലിന്റെ 9846100728, 9544477954, 9961761708 നമ്പറുകളില്‍ ബന്ധപ്പെടാം. അവധിക്കാലം ആഘോഷിക്കാനും ജില്ലയില്‍ നിന്ന് വിവിധ സ്ഥലങ്ങളിലേ്ക്ക് വിനോദയാത്ര തുടങ്ങുന്നതും പരിഗണനയിലുണ്ടെന്നും അധികൃതര്‍ അറിയിച്ചു.