കോഴിക്കോട്: കോഴിക്കോട് പണിക്കർ റോഡിൽ ഓട്ടോ ഡ്രൈവറെ വെട്ടിക്കൊന്ന കേസിൽ പ്രതി അറസ്റ്റിൽ. വെള്ളയിൽ സ്വദേശി ധനീഷ് ആണ് അറസ്റ്റിലായത്. ഓട്ടോ ഡ്രെെവർ ശ്രീകാന്തിനെ വെട്ടിക്കൊന്ന കേസിലാണ് അറസ്റ്റ്.

ഇന്നലെ വൈകുന്നേരം വീട്ടിൽ വച്ചാണ് പ്രതിയെ കസ്റ്റഡിയിൽ എടുത്തത്. പ്രതിയുടെ അമ്മയോട് ശ്രീകാന്ത് അപമര്യാദയായി പെരുമാറിയതാണ് വൈരാഗ്യത്തിന് കാരണമെന്നാണ് സൂചന. ശ്രീകാന്തിൻ്റെ കാറും തലേ ദിവസം കത്തിച്ചിരുന്നു. കൊലപാതകം നടത്തിയ ധനേഷ് തന്നെയാണ് ഇതിന് പിന്നിലെന്നും പൊലീസ് വ്യക്തമാക്കി. ഇതിൽ പോലീസ് അന്വേഷണം തുടരുന്നതിനിടെയിലാണ് കൊലപാതകം.

ഇന്നലെ പുലർച്ചയാണ് ശ്രീകാന്തിനെ കൊല്ലപ്പെട്ട നിലയിൽ കണ്ടെത്തുന്നത്. വീടിനു സമീപത്തെ പണിക്കർ റോഡിൽ വച്ചാണ് 47 കാരനായ ശ്രീകാന്ത് കൊല്ലപ്പെട്ടത്. രാവിലെ ക്ഷേത്രത്തിലേക്ക് പോകുകയായിരുന്ന സ്ത്രീകളാണ് ആദ്യം കണ്ടത്. തുടർന്ന് നാട്ടുകാരെ വിവരമറിയിച്ചു.

സിസിടിവി ദൃശ്യങ്ങൾ കേന്ദ്രീകരിച്ചാണ് പൊലീസ് അന്വേഷണം ഊർജ്ജിതമാക്കിയത്. കുണ്ടുപറമ്പ് പ്രഭാകരൻ വധക്കേസിലെ പ്രതിയാണ് ശ്രീകാന്ത്.