‘മ്മളെ നാദാപുരം’ പൂട്ടിച്ച് അധികൃതർ; കണ്ടെടുത്തത് ഉപയോഗശൂന്യമായ 24 ബോക്സ് ഐസ്ക്രീം
നാദാപുരം: നാദാപുരം ടൗണില്‍ താൽക്കാലികമായി പ്രവർത്തിച്ചിരുന്ന ഭക്ഷണ സ്റ്റാളിന്റെ പ്രവർത്തനം പഞ്ചായത്ത് അധികൃതരുടെ നേതൃത്വത്തിൽ നിർത്തിവെപ്പിച്ചു. ‘മ്മളെ നാദാപുരം’എന്ന പേരില്‍ സ്‌നാക്‌സ്, ജ്യൂസ്, ഐസ്ക്രീം എന്നിവയൊക്കെ വില്‍ക്കുന്ന കടയാണ് അടപ്പിച്ചത്.
ഉപയോഗശൂന്യമായ ഐസ്ക്രീം സൂക്ഷിച്ചുവച്ചതിന്റെ അടിസ്ഥാനത്തിലാണ് നടപടി. ഉപയോഗശൂന്യമായ 24 ബോക്സ് ഐസ്ക്രീം ആണ് ഫ്രീസറിൽ സൂക്ഷിച്ച നിലയില്‍ പരിശോധനക്കിടെ കണ്ടെത്തിയത്. തുടർന്ന് പഞ്ചായത്ത് അധികൃതർ കടനടത്തിപ്പുകാരന് 5000 രൂപ പിഴയിടുകയും സ്റ്റാളിന്റെ പ്രവർത്തനം നിർത്തിവെക്കാനുള്ള നിർദേശം നല്‍കുകയും ചെയ്തു.
പഞ്ചായത്ത് സെക്രട്ടറി ടി.ഷാഹുൽ ഹമീദ്, ഹെൽത്ത് ഇൻസ്പെക്ടർ കെ.സതീഷ് ബാബു എന്നിവരാണ് പരിശോധനയ്ക്ക് നേതൃത്വം നൽകിയത്.
ഭക്ഷണ സ്റ്റാള്‍ അടപ്പിച്ചത് കൂടാതെ നാദാപുരത്ത് പഞ്ചായത്ത് ഉടമസ്ഥതയിലുള്ള കെട്ടിടത്തില്‍ ഒരു വര്‍ഷത്തെ വാടക കുടിശ്ശിക വരുത്തിയ കടക്കെതിരെയും അധികൃതര്‍ നടപടിയെടുത്തു. സെക്രട്ടറി ടി.ഷാഹുല്‍ ഹമീദ്, ഹെല്‍ത്ത് ഇന്‍സ്പെക്ടര്‍ കെ.സതീഷ് ബാബു, സീനിയര്‍ ക്ലര്‍ക്ക് വി.എന്‍.കെ സുനില്‍ കുമാര്‍ എന്നിവരടങ്ങിയ സംഘം കട പൂട്ടി സീല്‍ ചെയ്യുകയായിരുന്നു.