ചാനലിലേക്ക് ഉപഭോക്താക്കളെ കൊണ്ടുവരുന്നതിന്റെ ഭാഗമായി പുത്തൻ ഫീച്ചറുകളാണ് ഇപ്പോള്‍ വാട്സ്ആപ്പ് ചാനൽസിൽ അവതരിപ്പിച്ചിരിക്കുന്നത്. വോയസ് അപ്‌ഡേറ്റുകള്‍ പങ്കുവെക്കാനുള്ള സൗകര്യമാണ് അതില്‍ പ്രധാനപ്പെട്ട കാര്യം. ചാനലിലൂടെ ക്രിയേറ്റര്‍മാര്‍ക്ക് അവരുടെ പ്രേക്ഷരോട് സ്വന്തം ശബ്ദത്തിലൂടെ സംവദിക്കാനും അതിലൂടെ അവരുമായി കൂടുതല്‍ അടുപ്പം നിലനിര്‍ത്താനും സാധിക്കും.

ചാനൽ പിന്തുടരുന്നവരിൽ നിന്ന് അഭിപ്രായം തേടാനും അവരുടെ പ്രതികരണം അറിയാനുമൊക്കെ ക്രിയേറ്റർമാർക്ക് വാട്സ്ആപ്പ് ഗ്രൂപ്പുകളിലുള്ള ‘പോൾസ്’ നടത്താന്‍ ഏര്‍പ്പെടുത്തിയിരിക്കുന്നതാണ് മറ്റൊരു ഫീച്ചര്‍. ഇതും പ്രേക്ഷകരുമായുള്ള ബന്ധം കൂടുതല്‍ ദൃഢപ്പെടുത്തും.

ചാനലുകളിൽ പങ്കുവെക്കുന്ന പോസ്റ്റുകൾ സ്റ്റാറ്റസാക്കി ഷെയർ ചെയ്യാനുള്ള ഓപ്ഷനും അവതരിപ്പിച്ചിട്ടുണ്ട്. ചാനലിലേക്ക് കൂടുതൽ പേരെയെത്തിക്കാൻ ഇതിലൂടെ സാധിക്കും. ചാനലുകൾക്ക് 16 അഡ്മിൻമാരെ വരെ വെക്കാനുള്ള സൗകര്യവും നിലവിലുണ്ട്.