കുറ്റ്യാടി-കോഴിക്കോട് റൂട്ടില്‍ സ്വകാര്യ ബസുകളുടെ മരണപ്പാച്ചിൽ, മൂന്ന് മാസത്തിനിടെ പൊലിഞ്ഞത് മൂന്ന് ജീവനുകൾ; ഡ്രെെവർക്കെതിരെ പോലീസ് ചുമത്തുന്നത് നിസാര വകുപ്പുകളെന്ന് ആരോപണം
പേരാമ്പ്ര: ജീവനും കയ്യിൽ പിടിച്ചാണ് കുറ്റ്യാടി കോഴിക്കോട് റൂട്ടിലുള്ള ഇരുചക്ര വാഹനങ്ങളിലുള്ളവർ യാത്ര ചെയ്യുന്നത്. സ്വകാര്യ ബസുകളുടെ മരണപ്പാച്ചിലാണ് ഇതിന് കാരണം. ഈ റൂട്ടിൽ മൂന്ന് മാസത്തിനിടെയുണ്ടായ വാഹനാപകടങ്ങളിൽ പൊലിഞ്ഞത് മൂന്ന് ജീവനുകളാണ്. ജൂൺ 26-ന് കൽപ്പത്തൂർ സ്വദേശി ബാലകൃഷ്ണനാണ് ഏറ്റവുമൊടുവിൽ മരിച്ചത്. റൂട്ടിലെ സ്വകാര്യ ബസുകളുടെ മരണപ്പാച്ചിലിനെ തുടർന്ന് നിരവധി ജീവനുകള്‍ നഷ്ടമാവുമ്പോഴും അധികൃതരുടെ ഭാഗത്ത് നിന്നും യാതൊരുവിധ നടപടിയും ഉണ്ടാകുന്നില്ലെന്ന് ആരോപണമുണ്ട്. അപകടത്തിനിടയാക്കുന്ന വാഹന ഡ്രെെവർക്കെതിരെ പോലീസ് ചുമത്തുന്നത് നിസാര വകുപ്പുകളാണെന്ന ആക്ഷേപമുണ്ട്.
തിങ്കളാഴ്ച രാവിലെ ഉള്ള്യേരി ബസ് സ്റ്റാന്റഡിന് മുന്നില്‍ വിദ്യാര്‍ഥികള്‍ സഞ്ചരിച്ച ബൈക്കില്‍ കുറ്റ്യാടിയില്‍ നിന്നും വന്ന സ്വകാര്യ ബസ് ഇടിച്ച്‌ രണ്ടുപേര്‍ക്ക് പരിക്കുപറ്റിയിരുന്നു. അശ്രദ്ധമായി ബസ് സ്റ്റാൻഡിലേക്ക് കയറ്റിയതാണ് അപകടത്തിനിടയാക്കിയതെന്ന് ആരോപണമുയർന്നിരുന്നു. എ.ഡിറ്റ് എഞ്ചിനിയറിംഗ് കോളേജിലെ വിദ്യാർത്ഥികളാണ് അപകടത്തിൽപെട്ടത്.
ആദ്യത്തെ അപകടത്തിന്റെ ആശങ്കയൊഴിയുന്നതിനുമുമ്പാണ് വൈകീട്ട് ഏഴുമണിയോടെ ഉള്ളിയേരി യു.പി. സ്കൂളിനടുത്ത് രണ്ടാമത്തെ അപകടമുണ്ടായത്. അച്ഛൻ മരിക്കുകയും മകൾക്ക് ഗുരുതരമായി പരിക്കേൽക്കുകയും ചെയ്തു. തെരുവത്ത് കടവിന് സമീപമുണ്ടായ അപകടത്തില്‍ മരിച്ചത് മകള്‍ക്കൊപ്പം സ്‌കൂട്ടറില്‍ വീട്ടിലേക്കു പോവുകയായിരുന്ന കൽപ്പത്തൂർ സ്വദേശി. കല്പത്തൂര്‍ കളരിക്കണ്ടി മുക്ക് കീര്‍ത്തനത്തില്‍ ബാലകൃഷ്ണനാണ് (56) മരിച്ചത്. സ്വകാര്യ ആശുപത്രിയില്‍ നഴ്‌സായി ജോലി ചെയ്തിരുന്ന മകളെ ജോലി കഴിഞ്ഞു വീട്ടിലേക്കു കൂട്ടിക്കൊണ്ടു പോവും വഴിയാണ് ഇദ്ദേഹം അപകടത്തില്‍പെട്ടത്. അപകടത്തില്‍ പരിക്കുപറ്റിയ മകള്‍ ചികിത്സയിലാണ്.
രാവിലെത്തെ അപകടം വരുത്തിയ ബസ്ഡ്രൈവർക്ക് ജാമ്യം കിട്ടാവുന്ന വകുപ്പുകളാണ് പോലീസ് ചുമത്തിയത്. എന്നാൽ, വൈകീട്ടുണ്ടായ അപകടത്തിൽ ബസ്ഡ്രൈവറുടെ പേരിൽ ജാമ്യമില്ലാവകുപ്പുകൾ ചേർത്ത് കേസെടുത്തു. ഇതിനുമുമ്പും അപകടമുണ്ടായിട്ടുണ്ട്.
കഴിഞ്ഞ മാസം ഇവിടെ നടന്ന അപകടത്തില്‍ ബൈക്ക് യാത്രികനായിരുന്ന കാവുംതറ സ്വദേശി മുഹമ്മദ് ഫാമിസ് (22) മരിച്ചിരുന്നു. മേയ് 13 നു അത്തോളി റൂട്ടില്‍ പുറക്കാട്ടിരി പാലത്തിനു സമീപമുണ്ടായ അപകടത്തില്‍ ബാലുശ്ശേരി സ്വദേശിയായ ബിരുദ വിദ്യാര്‍ഥി പി.കെ. അശ്വന്താണ് മരിച്ചത്. ജൂലായ് 19-ന് കൂട്ടാലിട റോഡ്‌ ജംഗ്‌ഷനിൽ ആംബുലൻസ് ഓട്ടോയിലിടിച്ച് ഓട്ടോഡ്രൈവർക്ക് ഗുരുതരമായി പരിക്കേറ്റിരുന്നു. ജൂലായ് പത്തിന് കരുവണ്ണൂരിൽ വിദ്യാർഥികൾ സഞ്ചരിച്ച കാർ മരത്തിലിടിച്ച് മറിഞ്ഞ് രണ്ടുപേർക്ക് പരിക്കേറ്റിരുന്നു.
കുറ്റ്യാടി-കോഴിക്കോട് റൂട്ടിൽ വാഹനാപകടം ഇപ്പോൾ സ്ഥിരം സംഭവമാവുകയാണ്. അശ്രദ്ധമായ ഡ്രെെവിംഗും സ്വകാര്യബസുകളുടെ മരണപ്പാച്ചിലാണ് അപകടങ്ങൾക്ക് പ്രധാനമായും കാരണമാകുന്നതെന്നാണ് ആക്ഷേപം. ഇതിനെതിരെ അധീകൃതർ ശക്തമായ നടപടികൾ സ്വീകരിക്കാത്തതും അപകടങ്ങൾ വർദ്ധിക്കുന്നതിന് കാരണമാകുന്നു.
സ്വകാര്യ ബസുകളുടെ സമയമൊപ്പിക്കാനുള്ള ഓട്ടപ്പാച്ചിലിനിടയിൽ പൊലിഞ്ഞ് പോകുന്നത് ഒരു കുടുംബത്തിന്റെ സ്വപ്നങ്ങളുെ പ്രതീക്ഷകളുമാണ്. അപകടങ്ങളും മരണങ്ങളും വർധിക്കുന്നതിൽ ആശങ്കയിലാണ് നാട്ടുകാർ.
Summary: Three people lose their life in Kutiyadi-Kozhikode Route. High Speed Driving of Private bus is the main reason of accident.