‘മദ്യലഹരിയില്‍ റോഡില്‍ കിടന്നിരുന്ന ശ്രീജിത്തിന് മേലേക്ക് കാർ കയറി, പുറത്തേക്കെടുക്കുന്നതിനിടെ നാട്ടുകാർ വരുന്നത് കണ്ട് ഓടിരക്ഷപ്പെട്ടു’; നാദാപുരത്ത് യുവാവിന്റെ ദുരൂഹമരണത്തില്‍ സുഹൃത്തിന്റെ മൊഴി
നാദാപുരം: നാദാപുരത്ത് ദുരൂഹസാഹചര്യത്തില്‍ മരിച്ച കാസര്‍ഗോഡ് സ്വദേശിയുടെ മരണത്തില്‍ വഴിത്തിരിവ്. താന്‍ ഓടിച്ച കാറിടിച്ചാണ് ശ്രീജിത്തിന് അപകടമുണ്ടായതെന്ന് സുഹൃത്ത് സമീഷ് ടി ദേവ് പോലീസിന് മൊഴി നല്‍കി. ഇയാള്‍ കഴിഞ്ഞ ദിവസം സ്‌റ്റേഷനിലെത്തി കീഴടങ്ങിയിരുന്നു. നാദാപുരം പോലീസ് ഇയാളുടെ അറസ്റ്റ് രേഖപ്പെടുത്തി.
മാഹിയിലെ ബാറില്‍ വച്ച് പരിചയപ്പെട്ട ഇരുവരും സമീഷിന്റെ ഇന്‍സ്റ്റ്ഗ്രാം സുഹൃത്തായ യുവതിയെ കാണാനാണ് നാദാപുരത്ത് എത്തിയിരുന്നത്. അമിത മദ്യലഹരിയിലായിരുന്ന ശ്രീജിത്ത് യുവതിയുടെ വീടിനടുത്ത് വച്ച് കാറില്‍ നിന്നിറങ്ങുകയും സമീഷ് ഭക്ഷണം വാങ്ങാനായി പോവുകയുമായിരുന്നെന്നും മദ്യലഹരിയില്‍ റോഡില്‍ കിടന്ന ശ്രീജിത്തിന്റെ ദേഹത്തേക്ക് കാര്‍ കയറിയിറങ്ങുകയുമായിരുന്നുവെന്നാണ് സമീഷ് പോലീസിന് നല്‍കിയ മൊഴിയില്‍ പറയുന്നത്.
ടയറിനടിയില്‍ കുടുങ്ങിയ ശ്രീജിത്തിനെ പുറത്തേക്ക് എടുത്ത് കിടത്തുന്നതിനിടെ നാട്ടുകാര്‍ വരുന്നത് കണ്ട് സമീഷ് സംഭവസ്ഥലത്ത് നിന്ന് രക്ഷപ്പെടുകയായിരുന്നെന്ന് പോലീസ് പറഞ്ഞു. കേസില്‍ യുവതിയുടെ മൊഴിയും പോലീസ് രേഖപ്പെടുത്തിയിട്ടുണ്ട്. സിസിടിവി ദൃശ്യത്തിന്റെയും കാറില്‍ നിന്ന് ലഭിച്ച പെട്രോള്‍ പമ്പിലെ ബില്ലിന്റെയും അടിസ്ഥാനത്തില്‍ നടത്തിയ അന്വേഷണത്തിലാണ് സിമീഷിലേക്ക് അന്വേഷണ സംഘമെത്തിയത്. ബാറില്‍ നിന്നും ഇറങ്ങിയ ഇവര്‍ മാഹിയിലെ പമ്പില്‍ നിന്ന് കാറിന് പെട്രോള്‍ അടിച്ചിരുന്നു. സമീഷിനെ കൂടുതല്‍ ചോദ്യം ചെയ്തതിന് ശേഷമായിരിക്കും കൂടുതല്‍ വകുപ്പുകള്‍ ചുമത്തുകയെന്ന് പോലീസ് വ്യക്തമാക്കി.
കഴിഞ്ഞ ശനിയാഴ്ചയാണ് നാദാപുരം കനാല്‍ റോഡില്‍ ശ്രീജിത്തിനെ ഗുരുതര പരിക്കുകളോടെ കണ്ടെത്തിയത്. ഉടന്‍ നാട്ടുകാര്‍ ചേര്‍ന്ന് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.