റൂണിയുടെ മിടുക്കില്‍ പയ്യോളിയില്‍ നിന്നും കാണാതായ ആളെ മണിക്കൂറുകള്‍ക്കുളളില്‍ കണ്ടെത്തി; നാട്ടുകാര്‍ക്കിടയില്‍ താരമായി പോലീസ് നായ
എസ് കെ കൊയിലാണ്ടി
പയ്യോളി: ‘റൂണിയുടെ മിടുക്കില്‍ കാണാതായ ആളെ മണിക്കൂറുകള്‍ക്കുളളില്‍ കണ്ടെത്തി. നാട്ടുകാര്‍ക്കിടയില്‍ താരമായി പോലീസ് നായ. പയ്യോളി സ്റ്റേഷന്‍ പരിധിയില്‍ വെള്ളിയാഴ്ച പുലര്‍ച്ചെ കാണാതായ ആളെയാണ് ഒന്നര വയസുള്ള റൂണിയെന്ന പോലീസ് നായ പന്ത്രണ്ട് മണിയോടെ കണ്ടെത്തിയത്.
ബന്ധുക്കള്‍ പയ്യോളി പോലീസില്‍ പരാതി നല്‍കിയതിനെ തുടര്‍ന്ന്.ഡി. വൈ.എസ്.പി ആര്‍.ഹരിദാസിന്റെ ശ്രദ്ധയില്‍പ്പെടുകയായിരുന്നു. തുടര്‍ന്നാണ് തന്റെ കീഴിലുള്ള ഡോഗ് സ്‌ക്വാഡിലെ റൂണിയെ വിട്ടു കൊടുത്തത്. റൂണിയെ കൊണ്ട് കാണാതായ ആളുടെ വീട്ടിലെത്തി വസ്ത്രം മണപ്പിച്ചു. ഇതിന് ശേഷം വീടിനു 100 മീറ്റര്‍ അകലെ ആളില്ലാത്ത വീട്ടില്‍ നിന്നും കാണാതായ ആളെ കണ്ടെത്തുകയായിരുന്നു.എ.എസ്.ഐ. കെ. പ്രവീണ്‍ കുമാര്‍, ടി.ടി. ഷിനോസ് കുമാര്‍, പി. ജിതേഷ് കുമാര്‍ എന്നിവരായിരുന്നു അന്വേഷണ സംഘത്തിലുണ്ടായിരുന്നത്.
ബെല്‍ജിയം മെനലോയിസ് ഇനത്തില്‍ പെട്ട നായയാണിത്. അമേരിക്കന്‍ പട്ടാളം ബിന്‍ലാദനേയും ഐ.എസ്.എസ്.തലവന്‍ അലി അക്ബര്‍ ബാഗ്ദാദിയേയും തിരഞ്ഞ് കണ്ടെത്താന്‍ ഈ ഇനത്തില്‍ പെട്ട നായയെയാണ് ഉപയോഗിച്ചിരുന്നത്.
ജില്ലാ ക്രൈം ബ്രാഞ്ച് ഡി.വൈ.എസ്.പി. ആര്‍ ഹരിദാസിന് കീഴില്‍ മൂന്ന് ഡോഗ് സ്‌കോഡുകളിലായി ഒന്‍പത് നായകളാണുള്ളത്. ഒന്നര വയസുള്ള റൂണിയാണ് കൂട്ടത്തില്‍ പ്രായം കുറഞ്ഞത്. മനുഷ്യന്റെ മണം മനസിലാക്കി തിരച്ചിലിന് പ്രത്യേക പരിശീലനം ലഭിച്ച നായയാണ് റൂണി. മൂന്ന് മാസമായപ്പോഴാണ് റൂണിയുടെ പരിശീലനം തുടങ്ങിയത്. എട്ടു മാസമായി റൂണി പയ്യോളി ഡോഗ് സ്‌കോഡിലെത്തിയിട്ട്.