കോഴിക്കോട്‌: പ്ലസ് വൺ സപ്ലിമെന്ററി അലോട്ട്മെന്റിന് ഇന്ന് മുതൽ അപേക്ഷിക്കാം. ഇന്ന് രാവിലെ പത്ത് മുതൽ വ്യാഴാഴ്ച വൈകിട്ട് അഞ്ച് മണിവരെ ഓൺലൈൻ ആയാണ് അപേക്ഷിക്കേണ്ടത്. മുഖ്യ ഘട്ടത്തിൽ അലോട്ട്മെന്റ് ലഭിക്കാഞ്ഞവർക്കും ഇതുവരെ അപേക്ഷിച്ചിട്ടില്ലാത്തവർക്കുമാണ് അവസരം.

സപ്ലിമെന്ററി അലോട്ട്മെന്റിന്റെ വേക്കൻസിയും നിർദേശങ്ങളും പൊതു വിദ്യാഭ്യാസ വകുപ്പിന്റെ www.admission.dge.Kerala.gov.in എന്ന അഡ്മിഷൻ ഗേറ്റ് വെ വെബ് സൈറ്റിൽ പ്രസിദ്ധീകരിക്കും. നിലവിൽ ഏതെങ്കിലും ക്വാട്ടയിൽ പ്രവേശനം നേടിയതോ മുഖ്യ ഘട്ടത്തിൽ അലോട്ട്മെന്റ് ലഭിച്ചിട്ട് ഹാജരാകാതിരുന്നതോ ഏതെങ്കിലും ക്വാട്ടയിൽ പ്രവേശനം നേടിയ ശേഷം വിടുതൽ സർട്ടിഫിക്കറ്റ് വാങ്ങിയതോ ആയ വിദ്യാർത്ഥികൾക്ക് ഈ ഘട്ടത്തിൽ അപേക്ഷിക്കാനാകില്ല.

അതേസമയം അപേക്ഷയില്‍ രേഖപ്പെടുത്തിയ വിവരങ്ങളിലെ പിശക് മൂലം അലോട്ട്‌മെന്റ് ലഭിച്ചിട്ടും പ്രവേശനം ലഭിക്കാത്തവര്‍ക്ക് അപേക്ഷ പുതുക്കുന്നതിനും സൗകര്യം ഒരുക്കിയിട്ടുണ്ട്. സപ്ലിമെന്ററി അലോട്ട്‌മെന്റിനായി ഒക്ടേബര്‍ 28 വരെ പുതുക്കിയ അപേക്ഷ ഫോറം ഓണ്‍ലൈനായി സമര്‍പ്പിക്കാവുന്നതാണ്. അപേക്ഷ സമര്‍പ്പിക്കുന്നതിനായി വിദ്യാര്‍ഥികള്‍ക്ക് ആവശ്യമായ സഹായങ്ങളും നിര്‍ദേശങ്ങളും നല്‍കാന്‍ സ്‌കൂളുകളില്‍ ഹെല്‍പ് ഡെസ്‌കുകള്‍ സജ്ജീകരിക്കണമെന്നും പൊതു വിദ്യാഭ്യാസ വകുപ്പ് പുറത്തിറക്കിയ വാര്‍ത്താ കുറിപ്പില്‍ പറഞ്ഞു.