കോഴിക്കോട് : വിദ്യാർഥികൾ തമ്മിലുള്ള സംഘർഷം തടയാനായി ജില്ലയിലെ വിവിധ വിദ്യാലയങ്ങൾ പോലീസ് നിരീക്ഷണത്തിൽ. പത്താംക്ലാസ്, ഹയർസെക്കൻഡറി പരീക്ഷകൾ അവസാനിക്കുമ്പോൾ ചെറിയ കാര്യങ്ങൾക്കുപോലും വിദ്യാർഥികൾ തമ്മിൽ ചില സ്കൂളുകളിൽ സംഘർഷത്തിനിടയുണ്ടെന്ന് നേരത്തേ ഇന്റലിജൻസ് റിപ്പോർട്ടുണ്ടായിരുന്നു. സിറ്റി-റൂറൽ ജില്ലാ പോലീസ് രഹസ്യാന്വേഷണ വിഭാഗം ഇത് സംബന്ധിച്ച് റിപ്പോർട്ട് നൽകിയിരുന്നു. ഇതിന്റെ അടിസ്ഥാനത്തിലാണ് സ്കൂളുകളിൽ പോലീസ് നിരീക്ഷണം ഏർപ്പെടുത്തിയത്.

മാർച്ച് 26, 29 തീയതികളിൽ നിയമവിരുദ്ധമായ രീതിയിൽ സംഘർഷം ഉണ്ടാക്കുന്ന തരത്തിൽ ആഹ്ലാദപ്രകടനങ്ങൾ നടത്താതിരിക്കാൻ സ്കൂൾ അധികൃതരുടെ സഹായത്തോടെ നിരീക്ഷണം ഏർപ്പെടുത്തും. ആഘോഷങ്ങളുടെ ഭാഗമായി അശ്രദ്ധവും അപകടകരവുമായ രീതിയിൽ സ്കൂൾ പരിസരങ്ങളിൽ വാഹനങ്ങൾ ഓടിച്ചാൽ അവ പിടിച്ചെടുക്കും. ലഹരി മാഫിയ സ്കൂൾ പരിസരങ്ങളിൽ ഇല്ലെന്ന് ഉറപ്പുവരുത്താനുള്ള നടപടികളുമുണ്ടാകും.

മുൻകരുതൽ നടപടി സ്വീകരിക്കുന്നതിന്റെ ഭാഗമായി കോഴിക്കോട് നഗരത്തിലെ അഞ്ച് സ്കൂളുകളുടെ പട്ടിക പോലീസ് തയ്യാറാക്കിയിട്ടുണ്ട്. വേനൽ അവധി ദിവസങ്ങളിൽ ഇത്തരം അനിഷ്ടസംഭവങ്ങൾ ഉണ്ടാകാതിരിക്കാനുള്ള മുൻകരുതൽ നടപടികളും പോലീസ് സ്വീകരിക്കും. എക്സൈസ്, പോലീസ് ഉദ്യോഗസ്ഥരുടെ സംയുക്ത നിരീക്ഷണവും ഇതിന്റെ ഭാഗമായുണ്ടാകും.