അരിക്കുളം: ലോകകപ്പിന്റെ ആവേശത്തിമര്‍പ്പിനിടയില്‍ അരിക്കുളം കുരുടി മുക്കില്‍ ഞെട്ടിക്കുന്ന കവര്‍ച്ച. കുരുടിമുക്ക് തട്ടാറത്ത് അറേബ്യൻ അഹമ്മദ് എന്നയാളുടെ ഉടമസ്ഥതയിലുളള ടറഫില്‍ സ്ഥാപിച്ച നാൽപ്പതിനായിരത്തോളം രൂപ വിലവരുന്ന പ്രോജക്റ്ററും അനുബന്ധ സാധനങ്ങളുമാണ് കള്ളന്മാർ അടിച്ചു മാറ്റിയത്. അറേബ്യൻ അഹമ്മദിന്റെ തന്നെ പുതുതായി പണികഴിപ്പിക്കുന്ന കുരുടിമുക്കിലെ മറ്റൊരു സൈറ്റിൽ നിന്നും 40 ഓളം വാർപ്പ് സീറ്റും മോഷണം പോയിട്ടുണ്ട്.

ലോകകപ്പ് മത്സരങ്ങള്‍ കൂട്ടമായി ആസ്വദിക്കാനുള്ള സൌകര്യങ്ങള്‍ കുരുടി മുക്കിലെ ടറഫില്‍ ഏര്‍പ്പെടുത്തിയിരുന്നു. ഫുട്ബോള്‍ ആസ്വദിക്കാന്‍ നാട്ടുകാരും സമീപപ്രദേശത്തുള്ളവരും ഇവിടെ ഒത്തുചേരുന്നതും പതിവായിരുന്നു. ലോകകപ്പ് മത്സരങ്ങള്‍ വലിയ സദസ്സിനൊപ്പം ഇരുന്ന് കാണാനുള്ള സംവിധാനം ഇല്ലാതായതിന്റെ വിഷമത്തിലാണ് ഇവിടുത്തെ ഫുട്ബോള്‍ പ്രേമികള്‍.

വിഷയത്തില്‍ മേപ്പയൂർ പോലീസ് സ്റ്റേഷൻ എസ്.ഐക്ക് രേഖാമൂലം പരാതി സമര്‍പ്പിച്ചിട്ടുണ്ട്. എത്രയും പെട്ടെന്ന് കള്ളന്മാരെ പിടിക്കുമെന്ന പ്രതീക്ഷയിലാണ് ഫുട്ബോൾ പ്രേമികളും സ്ഥാപന ഉടമയും.