പയ്യോളി: ഇരിങ്ങൽ ധർമ്മശാസ്ത്ര ക്ഷേത്രത്തിലും അയനിക്കാട് മമ്പറംഗേറ്റ് ഭഗവതി കോട്ടക്കൽ ദേവീക്ഷേത്രത്തിലും കവർച്ച. ഇന്ന് രാവിലെയോടെയാണ് സംഭവം പുറത്തറിയുന്നത്. അയനിക്കാട് മമ്പറംഗേറ്റ് ഭഗവതി ക്ഷേത്രത്തിലെ ചുറ്റുമതിലിന് പുറത്തുള്ള രണ്ട് സ്റ്റീൽ ഭണ്ഡാരങ്ങളുടെ പൂട്ട് തകർത്താണ് കവർച്ച നടത്തിയിരിക്കുന്നത്.

രാവിലെ ക്ഷേത്രത്തിലെത്തിയ ഭക്തനാണ് ഭണ്ഡാരത്തിന്റെ പൂട്ട് തകർന്ന് കിടക്കുന്നത് ക്ഷേത്ര ഭാരവാഹികളെ അറിയിക്കുന്നത്. തുടർന്ന് ഇവർ പയ്യോളി പോലീസിൽ പരാതി നൽകുകയായിരുന്നു.ഇതേ രീതിയിൽ തന്നെയാണ് ഇരിങ്ങൽ ധർമശാസ്ത്ര ക്ഷേത്രത്തിലും മോഷണം നടന്നിരിക്കുന്നത്.

ക്ഷേത്ര ചുറ്റുമതിലിനും പുറത്തും അകത്തുമുള്ള രണ്ട് സ്റ്റീൽ ഭണ്ഡാരങ്ങളുടെ പൂട്ട് തകർത്ത നിലയിലാണ്. മാത്രമല്ല ക്ഷേത്രത്തിലെ ഓഫീസിന്റെയും പൂട്ട് തകർത്തിട്ടുണ്ട്. എന്നാൽ ഓഫീസിൽ നിന്നും ഒന്നും നഷ്ടപ്പെട്ടിട്ടില്ല. സംഭവം ശ്രദ്ധയിൽപെട്ടതോടെ ക്ഷേത്ര ഭാരവാഹികൾ പയ്യോളി പോലീസിൽ പരാതി നൽകി.