തലശ്ശേരി: തലശ്ശേരി – മാഹി ബൈപ്പാസിൽ വീണ്ടും വാഹനാപകടം. സ്കൂട്ടർ നിയന്ത്രണം വിട്ട് മറിഞ്ഞ് വീട്ടമ്മ മരിച്ചു. ധർമടം മീത്തലെ പീടിക സ്വദേശി പാലത്തിൽ റുഖിയ ആണ് മരിച്ചത്. അറുപത്തിമൂന്ന് വയസായിരുന്നു.

വെള്ളിയാഴ്ച വൈകീട്ട് ബൈപ്പാസ് റോഡിൽ മാടപ്പീടിക റോഡിന് സമീപമായിരുന്നു അപകടം. തലശ്ശേരി ഭാഗത്ത് നിന്നും അഴിയൂർ ഭാഗത്തേക്ക് പോവുകയായിരുന്ന റുഖിയയും മകളും സഞ്ചരിച്ചിരുന്ന സ്കൂട്ടർ നിയന്ത്രണം നഷ്ട്ടപ്പെട്ട് ഡിവൈഡറിൽ ഇടിക്കുകയായിരുന്നു. അപകടത്തിൽ തലയ്ക്ക് ഗുരുതരമായി പരിക്കേറ്റ റുഖിയയെ ഉടൻ തന്നെ പള്ളൂർ ഗവ ആശുപത്രിയിലും തുടർന്ന് തലശ്ശേരിയിലെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. അപകടത്തിൽ മകൾക്ക് നിസ്സാര പരിക്കേറ്റു.