എറണാകുളം: കൈക്കൂലി വാങ്ങുന്നതിനിടെ സിവിൽ പൊലീസ് ഓഫിസർ പിടിയിൽ. എറണാകുളം മുളവുകാട് സ്റ്റേഷനിലെ സിവിൽ പോലിസ് ഓഫീസറായ പി.പി. അനൂപാണ് വിജിലൻസിന്റെ പിടിയിലായത്. 5000 രൂപ കൈകൂലി വാങ്ങുന്നതിനിടെയാണ് വിജിലൻസ് ഡി.വൈ.എസ്.പി ജയരാജിൻ്റെ നേത്യത്ത്വത്തിൽ സംഘം അനൂപിനെ പിടികൂടിയത്.

കെട്ടിടങ്ങൾ പൊളിക്കുന്ന കരാറുകാരനോട് ആണ് കൈക്കൂലി ആവശ്യപ്പെട്ടത്. പണം നൽകിയില്ലെങ്കിൽ കെട്ടിട അവശിഷ്ടങ്ങൾ നിക്ഷേപിക്കാൻ അനുവദിക്കില്ലെന്നും ലോറി പിടിച്ചെടുക്കുമെന്നും അനൂപ് ഭീഷണിപ്പെടുത്തി. ഇതിന് പിന്നാലെ കരാറുകാരൻ വിജിലൻസിനെ സമീപിക്കുകയായിരുന്നു.

വിജിലൻസിന്റെ നിർദ്ദേശപ്രകാരം പണം നൽകാമെന്ന് പറഞ്ഞ് കാക്കനാടേക്ക് വിളിച്ചുവരുത്തി. പണം കൈമാറുന്നതിനിടെ അനൂപിനെ വിജിലൻസ് കയ്യോടെ പിടികൂടി. പ്രതിയെ നാളെ കോടതിയിൽ ഹാജരാക്കും. അനൂപിന്റെ സ്വത്തുവിവരങ്ങൾ അന്വേഷിക്കാനുള്ള നടപടിയിലേക്കും വിജിലൻസ് കടക്കും.

Summary: police officer arrested while taking bribe