തിരുവനന്തപുരം: എക്‌സൈസ് വകുപ്പിൽ വനിതകൾക്കായി പുതിയ തസ്തിക. 65 വനിതാ സിവിൽ എക്‌സൈസ് ഓഫിസർ തസ്തിക സൃഷ്ടിച്ച് സർക്കാർ ഉത്തരവിറക്കി. ഓരോ ജില്ലയിലും പരമാവധി 7 നിയമനങ്ങളാണ് നടത്തുക.

നിലവിലുള്ള റാങ്ക് ലിസ്റ്റിൽ നിന്നാണ് നിയമനം നടത്തുക. കഴിഞ്ഞ ദിവസം മന്ത്രിസഭായോഗത്തിൽ ഇതു സംബന്ധിച്ച് തീരുമാനമെടുത്തിരുന്നു. തിരുവനന്തപുരം-5, കൊല്ലം-6, പത്തനംതിട്ട-7, ആലപ്പുഴ-4, കോട്ടയം-5, ഇടുക്കി-2, എറണാകുളം-3, തൃശൂർ-4, പാലക്കാട്-5, മലപ്പുറം-4, കോഴിക്കോട്-4, വയനാട്-5, കണ്ണൂർ-7, കാസർകോട്-4 എന്നിങ്ങനെയാണ് പുതുതായി സൃഷ്ടിക്കപ്പെടുന്ന തസ്തികകൾ. റാങ്ക് ലിസ്റ്റിന്റെ കാലാവധി 2025 ഏപ്രിൽ 16ന് അവസാനിക്കാനിരിക്കെയാണ് സർക്കാർ തീരുമാനം.