കോഴിക്കോട്: കൂടരഞ്ഞി പഞ്ചായത്തിലെ മേലെ കൂമ്പാറയില്‍ മിനി പിക്കപ്പ് വാന്‍ മറിഞ്ഞുള്ള അപകടത്തില്‍ ഒരാള്‍ മരിച്ചു. 16 പേര്‍ക്ക് പരിക്കേറ്റു. ഇതില്‍ മൂന്നുപേരുടെ നില ഗുരുതരമാണ്. ഡ്രൈവര്‍ ഉള്‍പ്പടെ 17 പേരാണ് വണ്ടിയില്‍ ഉണ്ടായിരുന്നത്. പശ്ചിമബംഗാള്‍ സ്വദേശി എസ്.കെ.ഷാഹിദുല്‍ ആണ് മരിച്ചത്.

ഇന്നലെ രാത്രി ഏഴ് മണിയോടെയായിരുന്നു അപകടം. ഇതര സംസ്ഥാന തൊഴിലാളികളുമായി പോയ വാഹനം വളവില്‍നിന്ന് നിയന്ത്രണംവിട്ട് മറിയുകയായിരുന്നു.

വാഹനം വീണ് ഒരു വീടിന്റെ മുകള്‍ ഭാഗം തകര്‍ന്നു. അപകട സ്ഥലത്തു നിന്ന് ആളുകളെ മാറ്റുന്നതിനിടയില്‍ പൊലീസും ആളുകളുമായി സംഘര്‍ഷമുണ്ടായി. തിരുവമ്പാടി സി.ഐ ആളുകളെ ബലം പ്രയോഗിച്ചു മാറ്റാന്‍ ശ്രമിച്ചതാണ് കാരണം.

മുക്കത്ത് നിന്നെത്തിയ ഫയര്‍ഫോഴ്‌സും നാട്ടുകാരും ചേര്‍ന്നാണ് രക്ഷാപ്രവര്‍ത്തനം നടത്തിയത്. മുക്കത്തെ സ്വകാര്യ മെഡിക്കല്‍ കോളേജ് ആശുപത്രിയിലും പരിക്കേറ്റ ഒരാളെ അരീക്കോട്ടെ സ്വകാര്യ ആശുപത്രിയിലുമാണ് പ്രവേശിപ്പിച്ചത്.

Summary: Mini pickup van overturned accident; One dead, 16 injured, three critically