അതിമനോഹരമായ പാറകെട്ടും കുത്തനെയുള്ള ഭീമാകാരമായ പാറയും അതിന്റെ മുകളില്‍ നൂറ്റാണ്ടുകള്‍ക്ക്‌ മുന്‍പ്‌ കൊത്തി ഉണ്ടാക്കിയ പടവുകളുമാണ് പ്രകൃതി സ്നേഹികളെ ഇവിടേക്ക് ആകര്‍ഷിക്കുന്നത്. മാതേശി അമ്മ എന്ന സ്ത്രീ ഒറ്റക്ക്‌ നൂറ്റാണ്ടുകള്‍ക്ക്‌ മുമ്പ് കൊത്തി ഉണ്ടാക്കിയതാണ് ഇവിടത്തെ പടവുകള്‍ എന്ന് ഒരു ഐതിഹ്യകഥ നിലവിലുണ്ട്. പടവുകളുടെ തുടക്കത്തില്‍ ഏതോ പ്രാചീന ലിപിയില്‍ കൊത്തി വെച്ച ലിഖിതങ്ങളും കാണാം. അതാണ് ഈ പ്രദേശത്തിന് കൊത്തുപാറ എന്ന പേര് സമ്മാനിക്കുന്നത്.

സാഹസിക ടൂറിസത്തിന് ഏറെ ഫലപ്രദമായി ഉപയോഗിക്കാന്‍ സാധിക്കുന്ന ഈ മേഖലയില്‍ ഇനിയും ധാരാളം സൌകര്യങ്ങള്‍ ഒരുക്കണമെന്ന ആവശ്യം വിനോദസഞ്ചാരികളും നാട്ടുകാരും ഉയര്‍ത്തുന്നുണ്ട്. ഇത് വഴി പെരുവണ്ണാമൂഴി വിനോദകേന്ദ്രത്തിലേക്ക് എത്താനും കഴിയുമെന്നത് ടൂറിസത്തിന്റെ സാദ്ധ്യത വര്‍ദ്ധിപ്പിക്കുന്നു. പേരാമ്പ്രക്ക് സമീപം പന്തിരിക്കരയില്‍ നിന്നും ചക്കിട്ടപ്പാറക്ക്‌ പോകുന്ന വഴിയിലാണ് കൊത്തിയപാറ. പേരാമ്പ്ര താനിക്കണ്ടി റോഡിലൂടെ കണ്ണോത്ത് യു.പി സ്കൂള്‍ പരിസരത്തു നിന്നും ഇവിടെ എത്തിച്ചേരാനാവും. എന്തായാലും തിരക്കുകളില്‍ നിന്നൊരിടവേള ആസ്വദിക്കണമെങ്കില്‍ രണ്ടാമതൊന്ന് ഇനി ആലോചിക്കേണ്ട, കത്തിയപ്പാറ നിങ്ങളെ കാത്തിരിപ്പുണ്ട്.