പുതിയ ഫീച്ചർ അവതരിപ്പിക്കാൻ ഒരുങ്ങുകയാണ് ഇൻസ്റ്റഗ്രാം. ഇഷ്ടപ്പെടാത്ത കമന്റുകൾക്ക് ‘ഡിസ് ലൈക്ക്’ ചെയ്യാൻ അനുവദിക്കുന്നതാണ് പുതിയ അപ്‌ഡേഷൻ. മറ്റൊരു സോഷ്യൽമീഡിയ പ്ലാറ്റ്ഫോമായ റെഡ്ഡിറ്റിലെ ഡൗൺവോട്ട് ബട്ടണിന് സമാനമായാണ് ഈ ഫീച്ചർ പ്രവർത്തിക്കുക.

ഫീച്ചർ എന്ന് പുറത്തിറക്കുമെന്നതിനെ കുറിച്ച് ഔദ്യോഗിക വിശദാംശങ്ങളൊന്നും മാതൃ കമ്പനിയായ മെറ്റ അറിയിച്ചിട്ടില്ല. മറ്റ് പുതിയ അപ്ഡേറ്റുകളും ഇൻസ്റ്റഗ്രാം പുതുതായി അവതരിപ്പിച്ചിരുന്നു. മൂന്ന് മിനുട്ട് ദൈർഘ്യമുള്ള റീലുകളും ഇനി ഇൻസ്റ്റ​ഗ്രാമിൽ പങ്ക് വെയ്ക്കാൻ സാധിക്കും. യൂട്യൂബ് ഷോർട്സിൽ മൂന്ന് മിനിറ്റ് വീഡിയോ ഷെയർ ചെയ്യാൻ അനുവദിച്ചതിന്റെ പിന്നാലെയാണ് ഇൻസ്റ്റ​ഗ്രാമും ഈ ഫീച്ചറാരംഭിച്ചത്.

പുതിയ വിഡിയോ എഡിറ്റിങ് ആപ്പ് പുറത്തിറക്കാനും ഇൻസ്റ്റഗ്രാം ആലോചിക്കുന്നുണ്ട്. പൂർണമായും സൗജന്യമായി പ്രവർത്തിക്കുന്ന എഡിറ്റിം​ഗ് ആപ്പ് ഉപയോ​ഗിച്ച് 10 മിനുട്ട് വരെ ദൈർഘ്യമുള്ള വിഡിയോകൾ എഡിറ്റ് ചെയ്യാൻ സാധിക്കും. കാപ്​കട്ട് യുഎസിൽ ഓഫ്​ലൈൻ സേവനം ആരംഭിച്ചതിനു പിന്നാലെയാണ് ഇൻസ്റ്റഗ്രാം പുതിയ ആപ്പ് പ്രഖ്യാപിച്ചത്.