കുഞ്ഞിപ്പള്ളി: മാഹി റെയിൽവേ സ്റ്റേഷൻ പരിസരത്ത് നിന്ന് സ്കൂട്ടർ മോഷണം പോയ സംഭവത്തിൽ പ്രതി പിടിയിലായി. കൊയിലാണ്ടി എടക്കുളം സ്വദേശി സൂര്യൻ(24) ആണ് പിടിയിലായത്. ന്യൂ മാഹി സ്വദേശിയുടെ സ്കൂട്ടർ ആണ് മോഷണം പോയത്.

ഇക്കഴിഞ്ഞ ഡിസംബർ 6ാം തിയതി മാഹി റെയിൽവേ സ്റ്റേഷൻ പരിസരത്ത് നിർത്തിയിട്ട സ്കൂട്ടർ 8 ആം തിയതി തിരിച്ച് വന്നപ്പോൾ കണ്ടില്ല. തുടർന്ന് യുവാവ് ചോമ്പാല പോലിസിൽ പരാതി നൽകുകയായിരുന്നു. അന്വേഷണത്തിൽ സൂര്യൻ സ്കൂട്ടറുമായി പോകുന്ന സിസിടിവി ദൃശ്യങ്ങൾ പൊലീസ് കണ്ടെത്തി. കൊയിലാണ്ടിയിൽ വെച്ച് കളവ് ചെയ്ത ബാറ്ററിയുമായി ഇതേ സ്കൂട്ടറിൽ സഞ്ചരിക്കവെ കൊയിലാണ്ടി പോലീസിന്റെ പിടിയിലായി. തുടർന്ന് റിമാന്റിലായ സൂര്യൻ ജാമ്യത്തിലിറങ്ങി ഒളിവിൽ പോയി.

ഇന്നലെ ചോമ്പാല പൊലീസ് കൊയിലാണ്ടിയിൽ നിന്ന് പ്രതിയെ പിടികൂടി. കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമാന്റ് ചെയ്തു. നിരവധി മോഷണക്കേസിൽ പ്രതിയാണ് പിടിയിലായ സൂര്യനെന്ന് പോലിസ് പറഞ്ഞു.