വില്ല്യാപ്പള്ളി : വില്ല്യാപ്പള്ളി മണ്ഡലം കോൺഗ്രസ്സ് കമ്മിറ്റിയുടെ നേതൃത്വത്തിൽ വില്ല്യാപ്പള്ളി റേഷൻ കടയ്ക്ക് മുമ്പിൽ സായാഹ്ന ധർണ്ണ സംഘടിപ്പിച്ചു. റേഷൻ സമ്പ്രദായം കാര്യക്ഷമമാക്കുക , ഡയറക്ട് പേയ്മെന്റ് സിസ്റ്റം നടപ്പിലാക്കി റേഷൻ കടകളെ തകർക്കാനുള്ള കേന്ദ്രസർക്കാർ നീക്കം ഉപേക്ഷിക്കുക, റേഷൻ കടകളിൽ അരിയും ഭക്ഷ്യധാന്യങ്ങളും ഉടൻ എത്തിക്കുക തുടങ്ങിയ മുദ്രാവാക്യങ്ങളുയർത്തിക്കൊണ്ടായിരുന്നു ധർണ്ണ. കെപിസിസി സെക്രട്ടറി അഡ്വ : ഐ. മൂസ ഉദ്ഘാടനം ചെയ്തു.

ഡയരക്ട് പേമെന്റ് സിസ്റ്റത്തിലൂടെ കേന്ദ്ര സർക്കാരും, വ്യാപാരികൾക്ക് മിനിമം വേതനം നൽകാതെ കേരള സർക്കാരും റേഷൻ കടകളെ തകർക്കുകയാണെന്ന് അദ്ദേഹം ഉദ്ഘാടന പ്രസം​ഗത്തിൽ പറഞ്ഞു. ഭക്ഷ്യ സുരക്ഷാ നിയമ പ്രകാരം ലഭിക്കേണ്ട ധാന്യങ്ങൾ മാസങ്ങളായി റേഷൻ കടകളിൽ ലഭ്യമല്ല. വാതിൽപ്പടി വി ത രണക്കാർ ഒരു മാസത്തോളം സമരം നടത്തിയിട്ടും സർക്കാർ മൗനം പാലിക്കുകയായിരുന്നെങ്കിലും, റേഷൻ വ്യാപാരികളെ ഭീഷണിപ്പെടുത്തി സമരം പിൻവലിപ്പിക്കുകയായിരുന്നുവെന്നും അദ്ദേഹം പറഞ്ഞു.

വില്ല്യാപ്പള്ളി മണ്ഡലം കോൺഗ്രസ്സ് പ്രസിഡണ്ട് സി. പി. ബിജു പ്രസാദ് അധ്യക്ഷത വഹിച്ചു. ബ്ലോക്ക് കോൺഗ്രസ്സ് പ്രസിഡന്റ് പി.സി. ഷീബ , ടി. ഭാസ്കരൻ, വി.ചന്ദ്രൻ, എൻ. ശങ്കരൻ, പൊന്നാറത്ത് മുരളി, വി. മുരളീധരൻ, ഷീല പത്മനാഭൻ, എൻ.ബി.പ്രകാശ് കുമാർ, വി.കെ.ബാലൻ, ചന്ദ്രൻ കുറ്റിയിൽ, രവീന്ദ്രൻ. പി.ടി. കെ എന്നിവർ സംസാരിച്ചു. രഞ്ജിത്ത് കുമാർ. വി.കെ സ്വാഗതവും ഹരിദാസ്. വി.പി നന്ദിയും പറഞ്ഞു.

Summary: Evening dharna of Congress in front of Villayappally ration shop