കോഴിക്കോട്: ദേശീയ പാതയിൽ കോഴിക്കോട് പൂളാടിക്കുന്ന് സ്കൂട്ടറിൽ ബൈക്കിടിച്ചുണ്ടായ അപകടത്തിൽ കാപ്പാട് സ്വദേശി മരിച്ചു. സ്‌കൂട്ടർ യാത്രക്കാരനായ കാപ്പാട് കണ്ണങ്കടവ് പാലം സ്വദേശി രതീഷ് (41) ആണ് മരിച്ചത്. ഹിമാലയൻ ബുള്ളറ്റ് ബൈക്കാണ് സ്കൂട്ടറിലിടിച്ചത്. വെള്ളിയാഴ്ച പുലർച്ചെ 4.30 ഓടെയായിരുന്നു അപകടം.

3 യുവാക്കൾ സഞ്ചരിച്ച ബുള്ളറ്റ് രതീഷും ഭാര്യ സിൻസിയും യാത്ര ചെയ്യുകയായിരുന്ന സ്‌കൂട്ടറിൽ ഇടിക്കുകയായിരുന്നു. അമിത വേഗതയിൽ അശ്രദ്ധമായാണ് ബൈക്ക് വന്നതെന്ന് നാട്ടുകാർ പറയുന്നു. ഗുരുതരമായി പരിക്കേറ്റ രതീഷിനെ കോഴിക്കോട് മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തലയ്ക്കും കാലിനും പരിക്കേറ്റ സിൻസി ചികിത്സയിലാണ്.

പ്രസവാനന്തരം ചികിത്സയിലായിരുന്ന സിൻസിയുടെ സഹോദരിയെ സന്ദർശിക്കുന്നതിനായി മെഡിക്കൽ കോളേജ് ആശുപത്രിയിലേക്ക് പോകുമ്പോഴായിരുന്നു അപകടം. രതീഷ് പന്തൽ തൊഴിലാളിയായി ജോലി ചെയ്തുവരികയായിരുന്നു.