കൊയിലാണ്ടി ആനക്കുളത്ത് സ്വകാര്യ ബസിന് പിന്നില്‍ കാറിടിച്ച് അപകടം
കൊയിലാണ്ടി: ദേശീയപാതയില്‍ ആനക്കുളം ജങ്ഷനില്‍ സ്വകാര്യ ബസിന് പിന്നില്‍ കാറിടിച്ച് അപകടം. ഇന്ന് ഉച്ചയ്ക്ക് 11.30ഓടെയാണ് സംഭവം. അപകടത്തില്‍ ആര്‍ക്കും പരിക്കില്ല. കണ്ണൂര്‍-കോഴിക്കോട് റൂട്ടില്‍ സര്‍വ്വീസ് നടത്തുന്ന സ്വകാര്യ ബസ് ബ്രേക്കിട്ടതോടെ പിറകിലുണ്ടായിരുന്ന വാഗണര്‍ കാര്‍ ബസിന് പിന്നില്‍ ഇടിക്കുകയായിരുന്നു.
ഇടിയുടെ ആഘാതത്തില്‍ ബസിന് പിറകിലെ ലാഡര്‍ ഭാഗം കാറിന്റെ ബോണറ്റില്‍ കുടുങ്ങുകയും വാഹനങ്ങള്‍ വേര്‍പെടുത്താന്‍ പറ്റാതെ വരികയും ചെയ്തു. കൊയിലാണ്ടിയില്‍ നിന്നും അഗ്നിരക്ഷാ സേന എത്തി ഹൈഡ്രോളിക് കട്ടര്‍ ഉപയോഗിച്ച് ലാഡര്‍ കട്ട് ചെയ്ത് വാഹനങ്ങളെ വേര്‍പെടുത്തുകയായിരുന്നു.
സ്റ്റേഷന്‍ ഓഫീസര്‍ വി.കെ.ബിജുവിന്റെ നേതൃത്വത്തില്‍ അസിസ്റ്റന്റ് സ്റ്റേഷന്‍ ഓഫീസര്‍ പി.എം.അനില്‍കുമാര്‍, എഫ്.ആര്‍.ഒമാരായ പി.കെ.ഇര്‍ഷാദ്, കെ.ബി.സുകേഷ്, കെ.ബിനീഷ്, ഇ.എം.നിധിപ്രസാദ്, എസ്.പി.സുജിത്ത്, കെ.നിധിന്‍രാജ്, ഹോംഗാര്‍ഡുമാരായ ഓംപ്രകാശ്, അനില്‍കുമാര്‍, രാംദാസ് എന്നിവര്‍ രക്ഷാപ്രവര്‍ത്തനത്തില്‍ ഏര്‍പ്പെട്ടു.