പേരാമ്പ്ര: ചങ്ങരോത്ത് വടക്കുമ്പാട് വീടിന്റെ ടെറസിൽ കൂട്ടിയിട്ട വൈക്കോൽ ശേഖരത്തിന് തീപിടിച്ചു. വടക്കുമ്പാടിനടുത്ത് വെളുത്തപറമ്പ് പുനത്തിൽ മുനീറിന്റെ വീട്ടിലായിരുന്നു സംഭവം. പേരാമ്പ്ര ഫയർഫോഴ്സ് സ്ഥലത്തെത്തി തീയണച്ചു.

തീ പടരുന്നത് ശ്രദ്ധയിൽപ്പെട്ട വീട്ടുകാർ വിവരം ഉടനെ ഫയർഫോഴ്സിനെ അറിയിക്കുകയായിരുന്നു. തുടർന്ന് പേരാമ്പ്ര അഗ്നിരക്ഷാ നിലയത്തിൽ നിന്നും അസി. സ്റ്റേഷൻ ഓഫീസർ എം പ്രദീപന്റെ നേതൃത്വത്തിൽ രണ്ട് യൂണിറ്റ് സ്ഥലത്ത് എത്തിയാണ് തീയണച്ചത്. രക്ഷാപ്രവർത്തനത്തിൽ സീനിയർ ഫയർ ആൻഡ് റെസ്ക്യൂ ഓഫീസർ കെ ബൈജു, ഫയർ ആൻഡ് റെസ്ക്യൂ ഓഫീസർമാരായ ടി ബബീഷ്, അരുൺ പ്രസാദ്, ധീരജ് ലാൽ, വിജീഷ്, വിപിൻ, സജിത്ത്, അജേഷ്, ഹോംഗാർഡ് മാരായ അജീഷ്, വിജേഷ് എന്നിവർ പങ്കാളികളായി.

സ്വാഭാവിക ജ്വലനം (spontaneous combustion) ആകാം തീപിടുത്തത്തിന് കാരണമെന്ന് സേന പറഞ്ഞു. കടുത്ത വേനൽ നേരിടുന്ന ഈ സാഹചര്യത്തിൽ ഇത്തരം പ്രവണതകൾ ഒഴിവാക്കേണ്ടതാണെന്നും ജനങ്ങൾ ജാഗ്രത പാലിക്കണമെന്നും സേന അറിയിച്ചു.