കുന്ദമംഗലം: ചൂലാംവയലിൽ നിയന്ത്രണംവിട്ട കെ.എസ്.ആർ.ടി.സി. ബസ് ഓട്ടോറിക്ഷയ്ക്ക് മുകളിലേക്ക് മറിയുന്നതിന്റെ സി.സി.ടി.വി ദൃശ്യങ്ങള്‍ പുറത്ത്. ഇന്നലെ ഉണ്ടായ അപകടത്തിൽ 12 പേർക്ക് പരിക്കേറ്റു. തിങ്കളാഴ്ച പകൽ മൂന്നുമണിക്ക് മാക്കൂട്ടം യു.പി. സ്കൂളിനുമുന്നിലാണ് അപകടം

മാനന്തവാടിയിൽനിന്ന് കോഴിക്കോട്ടേക്ക് വന്ന ബസാണ് അപകടത്തിൽപ്പെട്ടത്. ഇറക്കത്തിൽ നിയന്ത്രണം നഷ്ടമായ ബസ് ഏതിരേവന്ന ഗുഡ്‌സ് ഓട്ടോയിലാണ് ആദ്യം ഇടിച്ചത്. ശേഷം മറ്റൊരു ഓട്ടോ ടാക്സിയിലും ഇടിച്ചു. ഓട്ടോ ടാക്സിയിൽ കൊളുത്തിയ ബസ് പിന്നോട്ടടിച്ചശേഷം അതിനുമുകളിലേക്ക് വശം തിരിഞ്ഞ് മറിയുകയായിരുന്നു.

രണ്ടുവയസ്സുള്ള കുഞ്ഞും രണ്ട് സ്ത്രീകളും ഡ്രൈവറുമായിരുന്നു ഓട്ടോ ടാക്സിയിലുണ്ടായിരുന്നത്. നാട്ടുകാരും വഴിയാത്രക്കാരും ബസ് പൊക്കിയാണ് അടിയിൽപ്പെട്ട ഓട്ടോയിൽനിന്ന് കുഞ്ഞടക്കമുള്ളവരെ പുറത്തെടുത്തത്. ഇടിയുടെ ആഘാതത്തിൽ ഓട്ടോറിക്ഷ പൂർണമായും ബസിന്റെ ഒരുവശം ഭാഗികമായും തകർന്നു.

പരിക്കേറ്റവരെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. പരിക്കേറ്റവർ: ജുമൈലത്ത് പ്രസ് ഹൗസ് ചാലിയം (28), ഫാസില (32), താമരശ്ശേരി മുണ്ടപ്പുറം അബ്ദുൾഗഫൂർ (45), താമരശ്ശേരി വല്ലയിൽ ത്രേസ്യാമ സണ്ണി (55), ലിനിത (31), പശുക്കടവ് മുഞ്ഞനാട് സബിൻ (32), ചേലമ്പ്ര പറപ്പാട് സുഹറ (50), ഹൈറുന്നീസ (28), അമ്പായത്തോട് കിഴക്കേക്കര ശിവദാസൻ (56), റിസ്വാൻ പെരിന്തൽമണ്ണ (28), ഷംലത്ത് (28).

വീഡിയോ കാണാം: