നടുറോഡില്‍ സ്‌കൂട്ടറില്‍ അഭ്യാസം; യുവതിയെ ഇടിച്ച് വീഴ്ത്തിയ ശേഷം നിര്‍ത്താതെ പാഞ്ഞ് യുവാവ്; ഞെട്ടിക്കുന്ന അപകടദൃശ്യം പുറത്ത് (വീഡിയോ കാണാം)
പാലക്കാട്: റോഡില്‍ അഭ്യാസപ്രകടനത്തിനിടെ വീണ്ടും അപകടം. പാലക്കാട് നഗത്തില്‍ സ്‌കൂട്ടറുമായി അഭ്യാസപ്രകടനം നടത്തിയ യുവാവ് യുവതിയെ ഇടിച്ചിട്ട് നിര്‍ത്താതെ പോയി. പാലക്കാട് നഗരത്തിലെ എസ്.ബി.ഐ ജങ്ഷനില്‍ കഴിഞ്ഞ ദിവസം വൈകുന്നേരമാണ് സംഭവം.
റോഡിലൂടെ അപകടകരമായ രീതിയില്‍ സ്‌കൂട്ടര്‍ ഓടിച്ചുവന്ന യുവാവ് മറ്റൊരു സ്‌കൂട്ടറില്‍ സഞ്ചരിക്കുകയായിരുന്ന യുവതിയെ നടുറോഡില്‍ ഇടിച്ചു വീഴ്ത്തുകയായിരുന്നു. അപകടം സംഭവിച്ചിട്ടും ഇയാള്‍ വാഹനം നിര്‍ത്താതെ കടന്നുകളഞ്ഞു. ഇതിന്റെ ദൃശ്യങ്ങള്‍ പുറത്തുവന്നിട്ടുണ്ട്.
പേരാമ്പ്ര ന്യൂസ് ഡോട് കോമിന്റെ വാട്ട്സ്ആപ്പ് ഗ്രൂപ്പിൽ അംഗമാകാനായി ഇവിടെ ക്ലിക്ക് ചെയ്യുക.
അമിതവേഗതയില്‍ റോഡിലൂടെ അഭ്യാസപ്രകടനം നടത്തിയ യുവാവിനെ ഒരു കാറിലെ യാത്രക്കാര്‍ നേരത്തെ ശ്രദ്ധിച്ചിരുന്നു. ഇവരാണ് യുവാവിന്റെ ദൃശ്യങ്ങള്‍ കാറിലെ ക്യാമറയില്‍ റെക്കോഡ് ചെയ്തത്. പിന്നാലെ അമിതവേഗത്തില്‍ സ്‌കൂട്ടര്‍ ബസിനെ മറികടക്കുകയും സിഗ്‌നലിന് തൊട്ടുമുമ്പായി സ്‌കൂട്ടര്‍ യാത്രക്കാരിയെ ഇടിച്ചിട്ട് കടന്നുകളയുകയുമായിരുന്നു.
ദൃശ്യങ്ങളില്‍നിന്ന് സ്‌കൂട്ടറിന്റെ നമ്പര്‍ പൊലീസിന് ലഭിച്ചിട്ടുണ്ട്. KL-49-A-5831 ആണ് ബൈക്കിന്റെ നമ്പർ. ആലത്തൂര്‍ ആര്‍ടി ഓഫീസില്‍ രവി എന്നയാളുടെ പേരിലാണ് ഈ വാഹനം രജിസ്റ്റര്‍ ചെയ്തിരിക്കുന്നതെന്നും കണ്ടെത്തി. മോട്ടോര്‍വാഹന വകുപ്പില്‍ നിന്ന് കൂടുതല്‍ വിവരങ്ങള്‍ ശേഖരിച്ച് വൈകാതെ തന്നെ യുവാവിനെ പിടികൂടുമെന്നാണ് പൊലീസ് നല്‍കുന്ന വിവരം.