ചെങ്ങോടുമല പോരാളികള്‍ക്ക് അഭിവാദ്യമര്‍പ്പിച്ചുള്ള വീരാന്‍കുട്ടിയുടെ ഗാനം പാടിയും പടക്കം പൊട്ടിച്ചും വിജയമാഘോഷിച്ച് സമരസമിതി
കൂട്ടാലിട: പായസം വിതരണം ചെയ്തും പടക്കം പൊട്ടിച്ചും സമരവിജയം ആഘോഷിച്ച് ചെങ്ങോടുമല സമരസമിതി. രണ്ടാം വാര്‍ഡ് സമരസമിതി നടത്തിയ പരിപാടി നടന്‍ മുഹമ്മദ് പേരാമ്പ്ര ഉദ്ഘാടനം ചെയ്തു.
ചെങ്ങോടുമല പോരാളികള്‍ക്ക് അഭിവാദ്യമര്‍പ്പിച്ച് കവി വീരാന്‍കുട്ടി എഴുതിയ ഗാനം നരയംകുളം തണ്ടപ്പുറത്ത് നടന്ന ചെങ്ങോടുമല വിജയാഘോഷ വേദിയില്‍ കൊച്ചു സമരപോരാളി ഹരിനന്ദന ആലപിച്ചു. ചെങ്ങോടുമല ഏറ്റെടുത്ത് സംരക്ഷിക്കണമെന്ന വിദഗ്ധ സമിതി റിപ്പോര്‍ട്ട് സര്‍ക്കാര്‍ അംഗീകരിക്കണമെന്ന് സമരസമിതി ആവശ്യപ്പെട്ടു.
വിജയാഘോഷ പരിപാടിയില്‍ സമരസമിതി ചെയര്‍മാന്‍ വി.വി ജിനീഷ് അധ്യക്ഷത വഹിച്ചു. ശാസ്ത്ര സാഹിത്യ പരിഷത്ത് മുന്‍ സംസ്ഥാന ജനറല്‍ സെക്രട്ടറി രാധന്‍ മൂലാട് മുഖ്യപ്രഭാഷണം നടത്തി. ഗ്രാമപഞ്ചായത്തംഗം ടി.പി ഉഷ, ലിനീഷ് നരയംകുളം, കോഓഡിനേഷന്‍ കമ്മിറ്റി കണ്‍വീനര്‍ സുരേഷ് ചീനിക്കല്‍ തുടങ്ങിയവര്‍ സംസാരിച്ചു.