കുളം വൃത്തിയാക്കുന്നതിനിടെ മീന്‍ കൊത്തി, വിരലില്‍ അണുബാധ; തലശ്ശേരി സ്വദേശിയായ യുവാവിന്റെ കൈപ്പത്തി മുറിച്ചുമാറ്റി
തലശ്ശേരി: കുളം വൃത്തിയാക്കുന്നതിനിടെ മീന്‍ കൊത്തിയുണ്ടായ അണുബാധയെ തുടര്‍ന്ന് യുവാവിന്റെ കൈപ്പത്തി മുറിച്ചുമാറ്റി. തലശ്ശേരി മാടപ്പീടിക സ്വദേശി രജീഷിന്റെ വലതുകൈപ്പത്തിയാണ് മുറിച്ചുമാറ്റിയത്. കോശങ്ങളെ കാർന്നുതിന്നുന്ന അപൂർവ ബാക്ടീരിയ ശരീരത്തിലെത്തിയതാണ് കാരണം.
ഒരുമാസം മുമ്പാണ് രജീഷിന്റെ കൈയ്യില്‍ മീന്‍ കൊത്തി മുറിവുണ്ടായത്. ക്ഷീര കര്‍ഷകനായ രജീഷ് ഒരു മാസം മുമ്പ് വീടിനോട് ചേര്‍ന്ന് പച്ചക്കറി കൃഷി ചെയ്യുന്ന സ്ഥലത്തെ ചെറിയ കുളം വൃത്തിയാക്കിയിരുന്നു. ഇതിനിടെയാണ് മീന്‍ കൊത്തിയതും അണുബാധയുണ്ടായതും. കടു എന്ന പേരില്‍ അറിയപ്പെടുന്ന മീനാണ് കൊത്തിയത്.
വിരല്‍ത്തുമ്പില്‍ ചെറിയ മുറിവായിരുന്നു ഉണ്ടായിരുന്നത്. പിന്നാലെ കോടിയേരിയിലെ പ്രാഥമികാരോഗ്യ കേന്ദ്രത്തിലെത്തി പ്രതിരോധ കുത്തിവെച്ച് എടുത്തു. തുടക്കത്തില്‍ വേദനയായിരുന്നു ഉണ്ടായത്. പിന്നീട് കൈ മടങ്ങാതെ വന്നതോടെ മാഹിയിലെ ആശുപത്രിയില്‍ പ്രവേശിക്കുകയായിരുന്നു.
അവിടെനിന്നും കോഴിക്കോട്ടേ ആശുപത്രിയിലേക്ക് മാറ്റിയതോടെയാണ് രോഗത്തിന്റെ ഗുരുതരാവസ്ഥ മനസിലായത്. ഗ്യാസ് ഗാന്‍ഗ്രീന്‍ എന്ന അണുബാധയാണ് രജീഷിനെ ബാധിച്ചത്. ഈ അണുബാധ വിരലുകളില്‍ നിന്നും കൈപ്പത്തിയിലേക്ക് പടര്‍ന്നിരുന്നു. തലച്ചോറിനെ ബാധിക്കുമെന്നതിനാലാണ് കൈപ്പത്തി മുറിച്ചുമാറ്റാൻ ഡോക്ടർമാർ നിർദ്ദേശിച്ചത്. മീൻ കൊത്തിയുണ്ടായ മുറിവിലൂടെ ബാക്ടീരിയ അകത്തുകയറിയതാകാമെന്നാണ് ഡോക്ടർമാർ പറയുന്നത്.
Description: Young man's right palm amputated after infection in Thalassery