വടകര: വടകര നഗര സഭയുടെ കായിക വിദ്യാഭ്യാസ പദ്ധതി ‘ദിശ’ നേതൃത്വത്തിൽ താലൂക്ക് തല കായിക മേള ഫിബ്രുവരി 11, 12 തിയതികളിൽ നടക്കുമെന്ന് ചെയർ പേഴ്സൺ കെ പി ബിന്ദു വാർത്താ സമ്മേളനത്തിൽ അറിയിച്ചു. വടകര, തോടന്നൂർ, ചോമ്പാല, നാദാപുരം, കുന്നുമ്മൽ ഉപജില്ലയിലെ വിദ്യാലയങ്ങൾക്ക് നാല് കാറ്റഗറികളിലായി നാരായണനഗരം ഗ്രൗണ്ടിൽ വച്ചാണ് കായിക മേള നടക്കുക.

റിലേ കൂടാതെ ഒരു കുട്ടിക്ക് രണ്ട് ഇനങ്ങളിൽ പങ്കെടുക്കാം. മികച്ച നേട്ടം കൈവരിക്കുന്ന സ്ക്കൂളുകൾക്ക് ഒന്നാം സമ്മാനമായി 50,000 രൂപയും, രണ്ടാം സമ്മാനമായി 25,000 രൂപയും, മൂന്നാം സമ്മാനമായി 10,000 രൂപയും നൽകും. മത്സര വിജയികൾക്ക് ഓരോ ഇനത്തിലും പ്രത്യേകം സമ്മാനവും ഉണ്ടാവും. ഓൺലൈൻ ആയാണ് എൻട്രികൾ സ്വീകരിക്കുന്നത്. ഫെബ്രുവരി മൂന്നിന് വൈകിട്ട് അഞ്ച് വരെ എൻട്രികൾ സ്വീകരിക്കും.

എല്ലാവർക്കും സ്പോർട്സ് എല്ലാവർക്കും ആരോഗ്യം എന്ന ആശയത്തോടെ വടകര നഗരസഭ നടപ്പിലാക്കുന്ന സമഗ്ര കായിക പരിശീലന പരിപാടിയായ ദിശ കേരളത്തിലാകമാനം മാതൃകയാണ്. ദിശ ആരംഭിച്ച് രണ്ട് വർഷം പൂർത്തിയാകുമ്പോൾ നഗരസഭ ലക്ഷ്യം വച്ചതിലപ്പുറത്തേക്ക് കുട്ടികൾ മികവാർന്ന പ്രവർത്തനങ്ങൾ കാഴ്ചവെച്ചുകൊണ്ടിരിക്കയാണെന്നും വാർത്താസമ്മേളനത്തിൽ ചെയർ പേഴ്സൺ പറഞ്ഞു.

വാർത്താ സമ്മേളനത്തിൽ വൈസ് ചെയർമാൻ പി കെ സതീശൻ, എ പി പ്രജിത, രാജിത പതേരി, സിന്ധു പ്രേമൻ, പി സജീവ് കുമാർ, എഇഒ വി കെ സുനിൽ, കെ ടി ഹരീന്ദ്രൻ എന്നിവരും പങ്കെടുത്തു.

ALSO READ- വാടക വീട്ടിൽ പൊലീസ് പരിശോധന; വടകരയിൽ പെൺവാണിഭ സംഘം പിടിയിൽ

മത്സര ഇനങ്ങൾ: അണ്ടർ 11 (2014 ജനുവരി ഒന്നിന് ശേഷം ജനിച്ച പെൺകുട്ടികളും ആൺകുട്ടികൾ) – ഇനം – 100മീ, 200മീ ഓട്ടം, ലോങ് ജംപ്, ഷോട്ട്പുട്ട്, 4×100 മീറ്റർ റിലേ.

അണ്ടർ 12 ( 2013ന് ജനുവരി ഒന്നിന് ശേഷം ജനിച്ച പെൺകുട്ടികളും ആൺകുട്ടികൾ)- 100മീ, 200മീ, 400മീ ഓട്ടം – ഹൈജംപ്,ലോങ് ജംപ്,ഷോട്ട്പുട്ട്, 4×100 മീറ്റർ റിലേ.

അണ്ടർ 13 (01.01.2012 ജനുവരി ഒന്നിന് ന് ശേഷം ജനിച്ച പെൺകുട്ടികളും ആൺകുട്ടികൾ)- 100മീ, 200മീ, 400മീ, 600മീ ഓട്ടം, ഹൈജംപ്, ലോങ്ജംപ്, ഷോട്ട്പുട്ട്, 4×100 മീറ്റർ റിലേ.

അണ്ടർ 14 (01.01 2011 ജനുവരി ഒന്നിന് ശേഷം ജനിച്ച പെൺകുട്ടികളും ആൺകുട്ടികൾ)- 00മീ, 200മീ, 400മീ, 600മീ ഓട്ടം, ഹൈജംപ്, ലോങ്ജംപ്, ഷോട്ട്പുട്ട്, ഡിസ്കസ് ത്രോ, 4×100 മീറ്റർ റിലേ.

Summary: VADAKARA Taluk level sports fair in February