വടകര: കേരളത്തിലെ ഏക ഡ്രൈവ് ഇൻ ബീച്ച് എന്ന നിലയിലാണ് മുഴപ്പിലങ്ങാട് ബീച്ച് അറിയപ്പെടുന്നത്. തലശ്ശേരിയിൽ നിന്ന് ഏകദേശം 7 കിലോമീറ്റർ അകലെയാണ് ഈ ബീച്ച് സ്ഥിതി ചെയ്യുന്നത്. വടകര ഭാ​ഗത്ത് നിന്നുള്ളവർക്ക് ബീച്ചിലേക്ക് എത്താൻ ഏറ്റവും നല്ല മാർ​ഗം മാഹി ബൈപ്പാസാണ്. മാഹിപ്പാലത്തേയും തലശ്ശേരിയിലേയും കുരുക്കിൽപ്പെടാതെ എളുപ്പത്തിൽ കുഞ്ഞിപ്പള്ളിയിൽ നിന്ന് മാഹി ബൈപ്പാസ് വഴി മുഴപ്പിലങ്ങാട് എത്താം.

മനോഹരമായ ബീച്ചിന്റെ കാഴ്ചകൾ ആസ്വദിച്ച് 4 കിലോമീറ്ററോളം മണൽപരപ്പിലൂടെ വാഹനം ഓടിക്കാം.കേരളത്തിൽ മറ്റൊരിടത്തും കാണാത്ത അപൂർവവും ആവേശകരവുമായ അനുഭവമാണിത്. പരമാവധി 20 കിലോമീറ്റർ വേ​ഗത മാത്രമേ പാടുള്ളൂ എന്ന നിയന്ത്രണം നിലവിലുണ്ട്. നിങ്ങൾക്ക് ഏത് സ്ഥലത്തും നിർത്തി ബീച്ചിൽ വിശ്രമിക്കാനോ ഫോട്ടോകൾ എടുക്കാനോ കഴിയും. കടൽത്തീരത്ത് വാഹനമോടിക്കാൻ ഏറ്റവും അനുയോജ്യമായ സമയം വൈകുന്നേരമാണ്. ഇവിടെയുള്ള മണൽ ഉറച്ചതും മിനുസമാർന്നതുമാണ്. ബീച്ചിൽ വാഹനമോടിക്കാൻ നാമമാത്രമായ ഫീസ് നൽകണം.

കറുത്ത പാറകൾ കടൽത്തീരത്തെ ആഴത്തിലുള്ള പ്രവാഹങ്ങളിൽ നിന്ന് സംരക്ഷിക്കുന്നതിനാൽ ഇത് പലപ്പോഴും നീന്തൽക്കാരുടെ പറുദീസയായി കണക്കാക്കപ്പെടുന്നു. വാട്ടർ സ്‌പോർട്‌സ്, പവർ ബോട്ടിംഗ് അല്ലെങ്കിൽ ലളിതമായ കാറ്റമരൻ സവാരി എന്നിവയ്‌ക്കൊപ്പം പാരാഗ്ലൈഡിംഗ്, പാരാസെയ്‌ലിംഗ്, മൈക്രോ ലൈറ്റ് ഫ്‌ളൈറ്റുകൾ തുടങ്ങിയ സാഹസിക വിനോദങ്ങളിലും ആളുകൾ ഇവിടെ നിന്നും ഏർപ്പെടുന്നുണ്ട്.
മലബാറിന്റെ തനത് രുചികൾ വിളമ്പുന്ന നിരവധി കുടിൽ മാതൃകയിലുള്ള ചായക്കടകൾ ബീച്ചിലുണ്ട്. ഓണസദ്യയൊക്കെ കഴിച്ച് വൈകുന്നേരം കുടുംബത്തോടൊപ്പം ഈ ഓണത്തിന് മുഴപ്പിലങ്ങാട് ബീച്ചിലേക്ക് പോയി വരാം.

Description: Drive along the beach and enjoy the sunset; This Onam, let’s go straight to Muzhappilangad Beach through Mahi Bypass