35 സെന്റ് സ്ഥലത്ത് നാലുനിലയില്‍ ലീഡര്‍ കെ.കരുണാകരന്‍ സ്മാരക മന്ദിരം, ഉമ്മന്‍ചാണ്ടിയുടെ പേരില്‍ ഓഡിറ്റോറിയം; കോഴിക്കോട് ജില്ലാ കോണ്‍ഗ്രസ് കമ്മിറ്റിയുടെ ആസ്ഥാനം നാളെ തുറക്കും
കോഴിക്കോട്: ജില്ലാ കോണ്‍ഗ്രസ് കമ്മറ്റിയ്ക്ക് പുതിയ ആസ്ഥാന മന്ദിരമൊരുങ്ങി. കോഴിക്കോട് മനോരമ ഓഫീസിന് സമീപമുള്ള 35 സെന്റ് സ്ഥലത്ത് ഏഴരക്കോടി രൂപ ചെലവഴിച്ച് നാല് നില മന്ദിരമാണ് ഏപ്രില്‍ 12 ശനിയാഴ്ച രാവിലെ 11 മണിക്ക് ഉദ്ഘാടനം ചെയ്യുന്നത്. ലീഡര്‍ കെ.കരുണാകരന്‍ സ്മാരക മന്ദിരം എന്ന് നാമകരണം ചെയ്തിട്ടുള്ള കെട്ടിടത്തില്‍ മുന്‍ മുഖ്യമന്ത്രി ഉമ്മന്‍ ചാണ്ടിയുടെ പേരില്‍ 400 പേര്‍ക്ക് ഇരിക്കാവുന്ന തരത്തില്‍ ഓഡിറ്റോറിയവും സജ്ജമാക്കിയിട്ടുണ്ട്.
എല്ലാ പോഷക സംഘടനകള്‍ക്കും പുതിയ കെട്ടിടത്തില്‍ പ്രത്യേകം ഓഫീസും സജീകരിച്ചിട്ടുണ്ട്. പൂര്‍ണമായും ശീതീകരിച്ച കെട്ടിടത്തിന്റെ പ്രവേശന കവാടത്തില്‍ തന്നെ കെ.കരുണാകരന്റേയും ഉമ്മന്‍ചാണ്ടിയുടേയും അര്‍ദ്ധകായ പ്രതിമ കാണാം. കെട്ടിട ഉദ്ഘാടനത്തിന്റെ ഭാഗമായി ഏപ്രില്‍ ആറ് മുതല്‍ മെയ് ആറ് വരെ ഒരു മാസം നീണ്ടു നില്‍ക്കുന്ന ത്രിവര്‍ണോത്സവവും സംഘടിപ്പിച്ചിട്ടുണ്ട്.
വിവിധ വിഷയങ്ങളെ അധികരിച്ച് സംവാദം, ചര്‍ച്ചകള്‍, കാവ്യ സായാഹ്നം, നാടകം, പുസ്തക ചര്‍ച്ച, ചരിത്ര സെമിനാര്‍ എന്നിവയും നടന്നു വരുന്നു. എ.ഐ.സി.സി ജനറല്‍ സെക്രട്ടറി കെ.സി. വേണുഗോപാല്‍ ഉദ്ഘാടനം ചെയ്യുന്ന ചടങ്ങില്‍ കേരളത്തിനകത്തും പുറത്തുമുള്ള കോണ്‍ഗ്രസ് നേതാക്കളുടെ ഒരു വന്‍നിര തന്നെ ക്ഷണിക്കാക്കളായി എത്തുന്നുണ്ട്. ഡി.സി.സി പ്രസിഡണ്ട് അഡ്വ: കെ.പ്രവീണ്‍ കുമാറിന്റെ നേതൃത്വത്തില്‍ ഒന്നര വര്‍ഷം കൊണ്ടാണ് കെട്ടിടം പണി പൂര്‍ത്തിയായത്.
പുതിയ ഓഫീസില്‍ ഉയര്‍ത്താനുളള പതാക ഇരിങ്ങത്ത് പാക്കനാര്‍ പുരം ഗാന്ധിസദനത്തില്‍ വെച്ച് സ്വാതന്ത്ര്യ സമര സേനാനി അച്ചറോത്ത് കുഞ്ഞിക്കണ്ണന്‍ നമ്പ്യാരില്‍ നിന്ന് അഡ്വ: കെ. പ്രവീണ്‍ കുമാര്‍ ഏറ്റുവാങ്ങി. ചടങ്ങില്‍ ബ്ലോക്ക് കോണ്‍ഗ്രസ് കമ്മറ്റി പ്രസിഡണ്ട് കെ.പി.രാമചന്ദ്രന്‍ മാസ്റ്റര്‍ ആധ്യക്ഷ്യം വഹിച്ചു. ബ്ലോക്ക് കോണ്‍ഗ്രസ് കമ്മറ്റി ജനറല്‍ സെക്രട്ടറി ഇടത്തില്‍ രാമചന്ദ്രന്‍ ആമുഖ ഭാഷണം നടത്തി.
കെ.പി.സി.സി സെക്രട്ടറി സത്യന്‍ കടിയങ്ങാട്, കെ.പി.സി.സി. മെമ്പര്‍ പി.രത്‌നവല്ലി, ഡി.സി.സി. ജനറല്‍ സെക്രട്ടറി രാജേഷ് കീഴരിയൂര്‍, നിര്‍വ്വാഹക സമിതി അംഗം കെ.പി. വേണുഗോപാലന്‍, തുറയൂര്‍ മണ്ഡലം പ്രസിഡണ്ട് അര്‍ഷദ് ആയനോത്ത്, വി.വി. അമ്മത്, ബ്ലോക്ക് കോണ്‍ഗ്രസ് കമ്മറ്റി ഭാരവാനികളായ ഇ.കെ. ബാലകൃഷ്ണന്‍ നമ്പ്യാര്‍, കെ. അഷറഫ്, ലതേഷ് പുതിയേടത്ത്, സി.എം. ബാബു എന്നിവര്‍ സംസാരിച്ചു.