യാത്രക്കാരന്‍ മദ്യപിച്ച് ബഹളമുണ്ടാക്കി; ദുബൈയില്‍ നിന്നും കരിപ്പൂരിലേക്ക് പുറപ്പെട്ട വിമാനം തിരിച്ചിറക്കി
കരിപ്പൂര്‍: ദുബൈയില്‍ നിന്നും കരിപ്പൂരിലേക്ക് പുറപ്പെട്ട വിമാനം അടിയന്തരമായി തിരിച്ചിറക്കി. വിമാനത്തിനുള്ളില്‍ യാത്രക്കാരന്‍ മദ്യപിച്ച് ബഹളമുണ്ടാക്കിയതിനെ തുടര്‍ന്നാണ് വിമാനം തിരിച്ചിറക്കിയത്. ഞായറാഴ്ച പുലര്‍ച്ചെ പ്രാദേശിക സമയം ഒന്നരയോടെയാണ് സംഭവം.
ദുബൈയില്‍ നിന്ന് കോഴിക്കോടേക്ക് പുറപ്പെട്ടതാണ് ഫ്‌ലൈ ദുബൈ വിമാനം. വിമാനത്തില്‍ വേങ്ങര സ്വദേശിയായ യാത്രക്കാരന്‍ മദ്യപിച്ച് ബഹളമുണ്ടാക്കുകയായിരുന്നു.
വിമാനം ദുബൈയില്‍ നിന്ന് പുറപ്പെട്ട ശേഷവും ഇയാള്‍ ബഹളം തുടര്‍ന്നു. മറ്റ് യാത്രക്കാര്‍ക്ക് ശല്യമായതോടെ വേറെ വഴിയില്ലാതെ വിമാനം തിരിച്ചിറക്കുകയായിരുന്നു. തുടര്‍ന്ന് പൊലീസ് എത്തി ഇയാളെ കൊണ്ടുപോയതിന് ശേഷമാണ് വിമാനം വീണ്ടും പറന്നത്.
യാത്രക്കാരില്‍ നിന്ന് വേണ്ട വിവരങ്ങള്‍ ശേഖരിച്ച ശേഷമാണ് ദുബൈ പൊലീസ് ഇയാളെ കൊണ്ടുപോയത്. രാവിലെ ഏഴു മണിയോടെ കരിപ്പൂരില്‍ എത്തേണ്ട വിമാനം ഈ പ്രശ്‌നം കാരണം രാവിലെ പത്തരയോടെയാണ് എത്തിയത്.
Description: The flight from Dubai to Karipur was returned