കേരള ജേര്‍ണലിസ്റ്റ് യൂണിയന്‍ സംസ്ഥാന സമ്മേളനത്തിന് തിരുവനന്തപുരത്ത് കൊടി ഉയര്‍ന്നു
തിരുവനന്തപുരം: കേരള ജേര്‍ണലിസ്റ്റസ് യൂണിയന്‍ (കെ.ജെ.യു) ഒമ്പതാം സംസ്ഥാന സമ്മേളനത്തിന് തിരുവനന്തപുരം നന്ദന്‍കോട് സുമംഗലി ഓഡിറ്റോറിയത്തില്‍ (അശോകപുരം നാരായണന്‍ നഗര്‍) കൊടി ഉയര്‍ന്നു. സ്വാഗത സംഘം ചെയര്‍മാന്‍ തോട്ടക്കാട് ശശി പതാക ഉയര്‍ത്തി.
അടൂരില്‍ നിന്നും വൈസ് പ്രസിഡന്റ് സനല്‍ അടൂര്‍ നയിച്ച പതാക ജാഥയും നെയ്യാറ്റിന്‍കരയില്‍ നിന്നും വൈസ് പ്രസിഡന്റ് മണിവസന്തം ശ്രീകുമാറും നേതൃത്വം നല്‍കിയ കൊടിമര ജാഥകളും പാളയം രക്തസാക്ഷി മണ്ഡപത്തില്‍ സംഗമിച്ച ശേഷം സംയുക്തമായി സമ്മേളന നഗരിയിലേക്ക് എത്തുകയായിരുന്നു. പതാക സംസ്ഥാന ജനറല്‍ സെക്രട്ടറി കെ.സി. സ്മിജനും കൊടിമരം പ്രസിഡന്റ് അനില്‍ ബിശ്വാസും ഏറ്റുവാങ്ങി.
ദേശീയ എക്‌സി. അംഗം ബാബു തോമസ്, വൈസ് പ്രസിഡന്റ് എം.എ. ഷാജി, ദേശീയ സമിതി അംഗം ആഷിക്ക് മണിയംകുളം, പി.ബി. തമ്പി, ശിവകൈലാസ്, എസ്.ടി. വിനു, എം. സുജേഷ്, അനീഷ് തെങ്ങമം, ശിവപ്രസാദ്, വിഷ്ണു രാജ് എന്നിവര്‍ പ്രസംഗിച്ചു.
ഉച്ചക്ക് രണ്ടിന് ആരംഭിക്കുന്ന പ്രതിനിധി സമ്മേളനത്തിന്റെ ഭാഗമായി നടക്കുന്ന സമ്മേളനം മന്ത്രി വീണ ജോര്‍ജ് ഉദ്ഘാടനം ചെയ്യും. മുന്‍ പ്രതിപക്ഷ നേതാവ് രമേശ് ചെന്നിത്തല മുഖ്യപ്രഭാഷണം നടത്തും. വി.കെ. പ്രശാന്ത് എം.എല്‍. എ, ഐ.ബി. സതീഷ് എം.എല്‍.എ, സിനിമ താരം കൊല്ലം തുളസി എന്നിവര്‍ സംബന്ധിക്കും.
വൈകിട്ട് മൂന്നിന് പ്രതിനിധി സമ്മേളനം ഇന്ത്യന്‍ ജേര്‍ണലിസ്റ്റ്‌സ് യൂണിയന്‍ ദേശീയ സെക്രട്ടറി ജനറല്‍ എസ്. സബാനായകന്‍ ഉദ്ഘാടനം ചെയ്യും. 12 ന് ഉച്ചക്ക് രണ്ട് വരെ പ്രതിനിധി സമ്മേളനം തുടരും. 2.30ന് നടക്കുന്ന സമാപന സമ്മേളനം മന്ത്രി ജി.ആര്‍. അനില്‍ ഉദ്ഘാടനം ചെയ്യും. കടകംപ്പള്ളി സുരേന്ദ്രന്‍ എം.എന്‍.എ, ചലച്ചിത്ര അക്കാദമി ചെയര്‍മാന്‍ കഴക്കൂട്ടം പ്രേംകുമാര്‍, കെ.ജെ.യു സ്ഥാപക പ്രസിഡന്റ് റോയി മാത്യു, സ്ഥാപക ജനറല്‍ സെക്രട്ടറി ജഗദീഷ് ബാബു, മുന്‍ സംസ്ഥാന പ്രസിഡന്റുമാരായ സി.വി. മിത്രന്‍, ബാബു തോമസ്, മുന്‍ ഭാരവാഹികളായിരുന്ന സുരേഷ് പട്ടാമ്പി, എല്‍.ആര്‍. ഷാജി, ഷാജി ഇടപ്പള്ളി എന്നിവര്‍ സംബന്ധിക്കും. ആദ്യകാല നേതാക്കളെയും മുതിര്‍ന്ന മാധ്യമ പ്രവര്‍ത്തകരെയും സമ്മേളനം ആദരിക്കും.
പ്രതിനിധി സമ്മേളനത്തില്‍ വിവിധ ജില്ലകളില്‍ നിന്നായി തിരഞ്ഞെടുക്കപ്പെട്ട 300 ഓളം മാധ്യമ പ്രവര്‍ത്തകര്‍ പങ്കെടുക്കും.