ബസ് കാത്തുനില്‍ക്കവെ ബൈക്കില്‍ ചാരി നിന്നു; തിരുവല്ലയില്‍ വിദ്യാര്‍ത്ഥികളെ ബ്ലേഡ് കൊണ്ട് വരഞ്ഞ് പരിക്കേല്‍പ്പിച്ചു
പത്തനംതിട്ട: തിരുവല്ലയില്‍ ബൈക്കില്‍ ചാരി നിന്നുവെന്ന് ആരോപിച്ച് വിദ്യാര്‍ത്ഥികളെ ബ്ലേഡ് കൊണ്ട് വരഞ്ഞ് പരിക്കേല്‍പ്പിച്ചതായി പരാതി. കുന്നന്താനം ബി.എസ്.എന്‍.എല്‍ ഓഫീസിന് സമീപമാണ് സംഭവം. ബി.എസ്.എന്‍.എല്‍ ജീവനക്കാരനായ അഭിലാഷിനെതിരെയാണ് പരാതി.
ട്യൂഷന്‍ കഴിഞ്ഞ് വീട്ടിലേക്ക് പോകാനായി കാത്ത് നില്‍ക്കുകയായിരുന്നു വിദ്യാര്‍ത്ഥികള്‍. കുന്നന്താനം എന്‍.എച്ച്.എസ് ഹയര്‍ സെക്കന്ററി സ്‌കൂളിലെ പ്ലസ് വണ്‍ വിദ്യാര്‍ത്ഥികളായ എല്‍ബിന്‍, വൈശാഖ് എന്നിവര്‍ക്കാണ് പരിക്കേറ്റത്.
ഇവര്‍ ബസ് കാത്തുനില്‍ക്കവെയാണ് ആക്രമണം ഉണ്ടായത്. ബൈക്കില്‍ ചാരി നിന്നുവെന്ന് ആരോപിച്ച് എത്തിയ അഭിലാഷ് തങ്ങളെ ബ്ലേഡ് കൊണ്ട് ആക്രമിക്കുകയായിരുന്നുവെന്ന് വിദ്യാര്‍ത്ഥികള്‍ പറഞ്ഞു.
പരിക്കേറ്റ വിദ്യാര്‍ത്ഥികളെ മല്ലപ്പള്ളിയിലെ ആശുപത്രിയില്‍ പ്രവേശിപ്പിച്ചു. പ്രതിയായ അഭിലാഷ് ഒളിവിലാണ്. ഇയാള്‍ക്കായി അന്വേഷണം ആരംഭിച്ചുവെന്ന് പൊലീസ് അറിയിച്ചു.