കണ്ണൂക്കര: ശക്തമായ കാറ്റിലും മഴയിലും മാടാക്കരയിൽ വീട് ഭാ​ഗികമായി ഇടിഞ്ഞ് വീണു. മാടാക്കര തിരുവാണി ക്ഷേത്രത്തിന് സമീപം സതീശൻ റീത്ത ദമ്പതികളുടെ വീടാണ് ഇടിഞ്ഞ് വീണത്. ഇന്ന് പുലർച്ചെയായിരുന്നു സംഭവം. രാത്രി ശക്തമായ മഴയുണ്ടായിരുന്നു. ഇതിന് തൊട്ടുപിന്നാലെയാണ് ഓലമേഞ്ഞ വീടിന്റെ ഒരു ഭാ​ഗമാണ് പൂർണമായും ഇടിഞ്ഞ് വീണത്.

അപകട സമയം സതീശൻ മാത്രമായിരുന്നു വീട്ടിലുണ്ടായിരുന്നത്. വീട്ടിന്റെ ചുമരിൽ വിള്ളലുണ്ടായത് ശ്രദ്ധയിൽപ്പെട്ടതിനെ തുടർന്ന് സതീശൻ മുറി മാറി കിടന്നതിനാലാണ് വലിയ അപകടം ഒഴിവായതെന്ന് വാർഡം​ഗം പ്രമീള വടകര ഡോട് ന്യൂസിനോട് പറഞ്ഞു. വീടിന്റെ മേൽക്കൂര സമീപത്തെ വീട്ടിന് മുകളിലേക്കാണ് പതിച്ചത്. തുടർന്ന് ആ വീടിന്റെ ജനൽ വാതിൽ തകർന്നു.സമീപത്തെ കുടിവെള്ള പൈപ്പും ചുമർ കട്ടകൾ വീണ് തകർന്നിട്ടുണ്ട്.

തഹൽസിദാറുടെ നിർദേശത്തെ തുടർന്ന് വില്ലേജ് ഓഫീസർ സ്ഥലത്തെത്തി . സതീശൻ , റീത്ത എന്നിവരോട് സുനാമി ക്വാട്ടേഴ്സിലേക്ക് മാറി താമസിക്കാൻ നിർദ്ദേശിച്ചിട്ടുണ്ടെന്ന് വാർഡം​ഗം പറഞ്ഞു.