കുറ്റ്യാടി: മൊകേരിയില്‍ തെരുവുനായ ആക്രമണം. എട്ട് പേര്‍ക്കാണ് ഇവിടെ കടിയേറ്റത്. ഇതില്‍ മൂന്നുപേര്‍ കുട്ടികളാണ്. ഇവരെ കുറ്റ്യാടി താലൂക് ആശുപത്രിയില്‍ പ്രവേശിപ്പിച്ചു.

മൊകേരി, ചങ്ങരങ്ങുളം കോവുക്കുന്ന്, ചെക്യാട് എന്നിവിടങ്ങളിലുള്ളവരെയാണ് തെരുവുനായ ആക്രമിച്ചത്. ഇവിടെ തെരുവുനായ ശല്യം രൂക്ഷമാണെന്നാണ് പ്രദേശവാസികള്‍ പറയുന്നത്. രാത്രിയായാല്‍ കക്കട്ട്, മൊകേരി ടൗണുകളില്‍ തെരുവുനായകളുടെ വിഹാരമാണ്. ഭയത്തോടെയല്ലാതെ അത്യാവശ്യകാര്യങ്ങള്‍ക്കുപോലും പുറത്തുപോകാന്‍ പറ്റാത്ത അവസ്ഥയാണ്.

നായശല്യം വര്‍ധിച്ചതോടെ നായകളെ വളര്‍ത്താന്‍ ഇവിടെ ലൈസന്‍സ് നിര്‍ബന്ധമാക്കിയിരുന്നു. ഇതോടെ വളര്‍ത്തിയ നായകളെ ഉപേക്ഷിക്കുന്നത് കുറഞ്ഞിട്ടുണ്ടെന്ന് പഞ്ചായത്ത് അധികൃതര്‍ പേരാമ്പ്ര ന്യൂസ് ഡോട് കോമിനോടു പറഞ്ഞു. എന്നാല്‍ തെരുവുനായകളെ നിയന്ത്രിക്കാന്‍ അടിയന്തരമായി എന്തെങ്കിലും സംവിധാനം കൊണ്ടുവന്നില്ലെങ്കില്‍ ആളുകള്‍ക്ക് പുറത്തിറങ്ങാന്‍ കഴിയാത്ത സ്ഥിതിയാവുമെന്നാണ് നാട്ടുകാര്‍ പറയുന്നത്.