വൈദ്യുതി മുടങ്ങുമെന്ന ആശങ്ക ഇനി വേണ്ട; ‘സോളാര്‍ സ്മാര്‍ട്ട്, വൈദ്യുത ഉത്പാദനരംഗത്ത് സ്വയംപര്യാരായി വിളയാട്ടൂര്‍ ഗവ.എല്‍.പി സ്‌കൂള്‍
മേലടി: വൈദ്യുത ഉത്പാദനരംഗത്ത് സ്വയംപര്യാപ്തമാവാനൊരുങ്ങി വിളയാട്ടൂര്‍ ഗവ. എല്‍.പി സ്‌കൂള്‍. സ്‌കൂളിലെ ആവശ്യങ്ങള്‍ക്കായി സോളാര്‍ പാനല്‍ സ്ഥാപിച്ച് വൈദ്യുതി ഉത്പ്പാദിപ്പിക്കുന്നതിനാവശ്യമായ സജ്ജീകരണങ്ങളാണ് ഒരുക്കിയിരിക്കുന്നത്.
എസ്.എസ്.കെ ഫണ്ട് ഉപയോഗിച്ച് മേലടി ബി.ആര്‍.സി ആണ് പദ്ധതി നടപ്പാക്കുന്നത്. എസ്.എസ്.കെയില്‍ നിന്ന് അനുവദിച്ച രണ്ടര ലക്ഷം രൂപ ഉപയോഗിച്ചാണ് സോളാര്‍ സ്ഥാപിച്ചത്. മൂന്ന് കിലോവാട്ട് റൂഫ് ടോപ്പ് സോളാര്‍ പ്ലാന്റാണ് ഇതിനായി ഒരുക്കിയിട്ടുള്ളത്. ആറ് പാനലുകളാണ് സ്‌കൂളിലുള്ളത്. അനാര്‍ട്ടാണ് നിര്‍മ്മാണ ചുമതല വഹിച്ചത്. പദ്ധതി പ്രാവര്‍ത്തികമാകുന്നതോടെ സ്‌കൂളില്‍ വൈദ്യുതി മുടങ്ങുമെന്ന ആശങ്കയ്ക്ക് വിരാമമാകും.
എല്‍.കെ.ജി മുതല്‍ നാലാം ക്ലാസ് വരെ നൂറിന് മുകളില്‍ വിദ്യാര്‍ത്ഥികളാണ് സ്‌കൂളില്‍ പഠിക്കുന്നത്. പഞ്ചായത്തിലെ ഏറ്റവും പഴക്കം ചെന്ന സ്‌കൂളില്‍ ഒന്നാണ് വിളയാട്ടൂര്‍ ഗവ. എല്‍.പി സ്‌കൂള്‍. പൊതുവിദ്യാഭ്യാസ സ്ഥാപനങ്ങളുടെ ഭൗതിക സാഹചര്യം ഉയര്‍ത്തി വിദ്യാര്‍ത്ഥികള്‍ക്ക് മികച്ച വിദ്യാഭ്യാസം നല്‍കുന്നതിനാവശ്യമായ നടപടികളാണ് വിദ്യാഭ്യാസ വകുപ്പ് മുഖേന സര്‍ക്കാര്‍ നടപ്പാക്കി വരുന്നത്. ഇതിന്റെ തുടര്‍ച്ചയായാണ് സ്‌കൂളില്‍ സോളാര്‍ പാനല്‍ സ്ഥാപിച്ചത്.