‘ കെ.എസ്.യു കലോത്സവ വേദികളെ കൊലക്കളമാക്കാന്‍ ശ്രമിക്കുന്നു’; നാളെ കാലിക്കറ്റ് സര്‍വ്വകലാശാലയ്ക്ക് കീഴിലുള്ള കോളേജുകളില്‍ എസ്.എഫ്.ഐ പഠിപ്പുമുടക്ക്
തിരുവനന്തപുരം: തൃശൂര്‍ മാളയില്‍ നടന്ന കാലിക്കറ്റ് സര്‍വകലാശാല ഡീസോണ്‍ കലോത്സവത്തിനിടെ ഉണ്ടായ സംഘര്‍ഷത്തില്‍ പ്രതിഷേധിച്ച് ബുധനാഴ്ച പഠിപ്പുമുടക്കിന് ആഹ്വാനം ചെയ്ത് എസ്.എഫ്.ഐ. കാലിക്കറ്റ് സര്‍വകലാശാലയ്ക്ക് കീഴിലുള്ള മുഴുവന്‍ വിദ്യാഭ്യാസ സ്ഥാപനങ്ങളിലും പഠിപ്പുമുടക്ക് നടത്തുമെന്ന് എസ്.എഫ്.ഐ സംസ്ഥാന സെക്രട്ടറി പി.എം.ആര്‍ഷോ അറിയിച്ചു.
അക്രമപരമ്പരയില്‍ പ്രതിഷേധിച്ചും വരാനിരിക്കുന്ന കലോത്സവങ്ങളില്‍ അക്രമങ്ങള്‍ ഉണ്ടാകാതിരിക്കാനുമാണ് സൂചനാപരമായി പഠിപ്പുമുടക്കിന് ആഹ്വാനം ചെയ്യുന്നതെന്ന് പി.എം.ആര്‍ഷോ പറഞ്ഞു. സംഘര്‍ഷവുമായി ബന്ധപ്പെട്ട് എസ്.എഫ്.ഐ പോലീസില്‍ പരാതി നല്‍കുമെന്ന് അറിയിച്ച ആര്‍ഷോ കെ.എസ്.യു അക്രമത്തില്‍ നിന്ന് പിന്മാറണമെന്ന് ആവശ്യപ്പെട്ടു.
കാലിക്കറ്റ് യൂണിവേഴ്സിറ്റി യൂണിയന്റെ നേതൃത്വത്തില്‍ മാള ഹോളിഗ്രേസ് അക്കാദമിയില്‍ വെച്ച് സംഘടിപ്പിച്ച ഡി സോണ്‍ കലോത്സവത്തില്‍ പങ്കെടുക്കാനെത്തിയ വിദ്യാര്‍ത്ഥികള്‍ക്ക് ക്രൂരമായ മര്‍ദ്ദനമാണ് നേരിടേണ്ടിവന്നത്. കലോത്സവം ആരംഭിച്ച ജനുവരി 24 മുതല്‍ തന്നെ വിവിധ ഓഫ് സ്റ്റേജ് ഓണ്‍ സ്റ്റേജ് മത്സരങ്ങളുമായി ബന്ധപ്പെട്ട് വ്യാപക പരാതികള്‍ വിദ്യാര്‍ത്ഥികളില്‍ നിന്ന് ഉയര്‍ന്നിരുന്നു. മണിക്കൂറുകളോളം വൈകി നടന്ന മത്സരങ്ങളെല്ലാം വലിയ ബുദ്ധിമുട്ടാണ് മത്സരാര്‍ത്ഥികള്‍ക്ക് ഉണ്ടാക്കിയത്.
കഴിഞ്ഞ ദിവസം നടന്ന സ്‌കിറ്റ് മത്സരവുമായി ബന്ധപ്പെട്ട് ഉണ്ടായ പ്രശ്നങ്ങള്‍ സംഘാടകസമിതി ഭാരവാഹികളുമായി സംസാരിക്കവെയാണ് സംഘര്‍ഷമുണ്ടായത്. ആക്രമണത്തില്‍ കേരളവര്‍മ്മ കോളേജ് യൂണിറ്റ് സെക്രട്ടറി ആശിഷ്, യൂണിയന്‍ ചെയര്‍പേഴ്സണ്‍ ഗോപിക നന്ദന, യുയുസി അഗ്നിവേശ്, ഫിദല്‍ കാസ്ട്രോ, ഉള്‍പ്പെടെ നിരവധി കോളേജ് യൂണിയന്‍ ഭാരവാഹികള്‍ക്കും മത്സരാര്‍ത്ഥികള്‍ക്കുമാണ് പരിക്കേറ്റത്.
Description: SFI strike in colleges under Calicut University tomorrow