താമരശേരി: താമരശ്ശേരി ചുരത്തില്‍ സ്‌കൂട്ടര്‍ നിയന്ത്രണം വിട്ട് താഴ്ചയിലേക്ക് മറിഞ്ഞ് അപകടം. അഞ്ചാം വളവിലാണ് ഇരുചക്ര വാഹന യാത്രികന്‍ അപകടത്തില്‍പ്പെട്ടത്. ഇന്ന് രാവിലെയാണ് അപകടമുണ്ടായത്. അപകടത്തില്‍ പരിക്കേറ്റ യാത്രികനെ ആശുപത്രിയില്‍ പ്രവേശിപ്പിച്ചു. പെരിന്തല്‍മ്മണ്ണ സ്വദേശിയായ വിദ്യാര്‍ത്ഥിയാണ് അപകടത്തില്‍പ്പെട്ടത്.

കഴിഞ്ഞ കുറച്ച് നാളുകള്‍ക്കുള്ളില്‍ ചുരത്തില്‍ നിരവധി അപകടങ്ങളാണ് ഉണ്ടായത്. ആഴ്ചകള്‍ക്ക് മുമ്പ് ഓറഞ്ച് കയറ്റി വന്ന ചരക്കുലോറി ജുമാ മസ്ജിദിന് മുകളിലേക്ക് മറിഞ്ഞ് അപകടമുണ്ടായിരുന്നു. ഇറക്കമിറങ്ങുന്നതിനിടെ വാഹനത്തിന്റെ നിയന്ത്രണം നഷ്ടമായതാണ് അപകട കാരണം.

അടിവാരത്ത് നിന്ന് രണ്ട് കിലോമീറ്റര്‍ മാറി ഒന്നാം വളവിന് താഴെയായി ചുരം 28 -ല്‍ മദ്യവുമായി വന്ന ലോറി മറിഞ്ഞും അതിന് മുമ്പ് ലിമിറ്റഡ് സ്റ്റോപ്പ് ബസും കാറും കൂട്ടിയിടിച്ചും അപകടം നടന്നിരുന്നു.