കുറ്റ്യാടി: കിടപ്പു രോഗികളെ വീടുകളില്‍ എത്തി ചികിത്സ നല്‍കുന്ന പാലിയേറ്റീവ് രംഗത്തെ നൂതന പദ്ധതിയായ ‘ഗൃഹവൈദ്യം’ വേളം പഞ്ചായത്തില്‍ തുടക്കമായി. പഞ്ചായത്ത് തലത്തില്‍ പദ്ധതി കുന്നുമ്മല്‍ ബ്ലോക്ക് പഞ്ചായത്ത് വൈസ് പ്രസിഡന്റ് മുഹമ്മദ് കക്കട്ടില്‍ ഉദ്ഘാടനം ചെയ്തു.

പഞ്ചായത്ത് പ്രസിഡന്റ് നയിമ കുളമുള്ളതില്‍ അധ്യക്ഷത വഹിച്ചു. ജനപ്രതിനിധികളും ആരോഗ്യ വകുപ്പ് ഉദ്യോഗസ്ഥരും സംസാരിച്ചു. ബ്ലോക്ക് വൈസ് പ്രസിഡന്റിന്റെ നേത്യത്വത്തില്‍ കിടപ്പു രോഗികളുടെ വീടുകളിലെത്തി പരിശോധന നടത്തി.

കുന്നുമ്മല്‍ ബ്ലോക്ക് പഞ്ചായത്ത് പരിധിയിലെ നരിപ്പറ്റ, കുന്നുമ്മല്‍, കുറ്റ്യാടി, കായക്കൊടി, കാവിലുംപാറ, മരുതോങ്കര, വേളം എന്നീ പഞ്ചായത്തുകളിലാണ് പദ്ധതി നടപ്പിലാക്കുന്നത്. ഡോക്ടര്‍, പാലീയേറ്റീവ് ടീം, ആശ വര്‍ക്കര്‍മാര്‍ എന്നിവരടങ്ങുന്ന ടീം ആണ് വീടുകളില്‍ എത്തി രോഗികളെ പരിശോധിക്കുന്നതും, മരുന്നുള്‍പ്പെടെ എത്തിച്ചു കൊടുക്കുന്നതും.