വടകര: വടകര റെയിൽവേ സ്റ്റേഷനിലെ ലിഫ്റ്റിൽ യാത്രക്കാർ കുടുങ്ങി. ഭിന്നശേഷിക്കാരനായ യുവാവും രണ്ട് യുവതികളുമാണ് ലിഫ്റ്റിൽ കുടുങ്ങിയത്. രാവിലെ എട്ടരയ്ക്കുള്ള യശ്വന്ത്പൂർ എക്സ്പ്രസിന് കയറാനെത്തിയതായിരുന്നു ഇവർ.

15 മിനിട്ടിലേറെ നേരം ലിഫ്റ്റിൽ മൂവരും കുടുങ്ങി. ലിഫറ്റിൽ പ്രദർശിപ്പിച്ച എമർജൻസി നമ്പറുകളിൽ വിളിച്ചിട്ട് ബന്ധപ്പെട്ടവർ ഫോണെടുത്തില്ലെന്ന് യാത്രക്കാർ പറയുന്നു. റെയിൽവേയുടെ നമ്പറിൽ ബന്ധപ്പെട്ടപ്പോൾ തൃശൂരിലാണ് ലഭിച്ചത്. ഇവർ വിവരമറിയിച്ചതോടെ വടകര റെയിൽവേ അധികൃതർ എത്തി യാത്രക്കാരെ രക്ഷപ്പെടുത്തുകയായിരുന്നു.

അതേ സമയം നേരത്തെ തകരാറിലായ ലിഫ്റ്റാണിതെന്നും ഡോർ തുറന്ന് കിടക്കുകയായിരുന്നെന്നും യാത്രക്കാർ ഇത് ശ്രദ്ധിക്കാതെ ലിഫ്റ്റിനകത്ത് പ്രവേശിച്ചപ്പോഴാണ് കുടുങ്ങിപ്പോയതെന്നും റെയിൽവേ ജീവനക്കാർ വടകര ഡോട് ന്യൂസിനോട് പറഞ്ഞു.