ഗൂഗിൾ നൽകുന്ന എല്ലാ നമ്പറുകളും ശരിയല്ല; വ്യാജ കസ്റ്റമർ കെയർ നമ്പർ പ്രദർശിപ്പിച്ച് പണം തട്ടുന്നവർക്കെതിരെ മുന്നറിയിപ്പുമായി കേരള പൊലീസ്
വെബ്‌സൈറ്റിൽ വ്യാജ കസ്റ്റമർ കെയർ നമ്പർ പ്രദർശിപ്പിച്ച് പണം തട്ടുന്നവർക്കെതിരെ മുന്നറിയിപ്പുമായി കേരള പൊലീസ്. സാങ്കേതിക പ്രശ്‌നങ്ങൾ കൊണ്ട് ഓൺലൈനിൽ പണമിടപാട് നടത്തി പണം നഷ്ടപ്പെടുമ്പോൾ ഇത് സംബന്ധിച്ച സംശയങ്ങൾക്ക് ഔദ്യോഗിക വെബ്‌സൈറ്റുകൾ കണ്ടെത്താൻ ശ്രമിക്കാതെ ഗൂഗിളിൽ തിരയുന്നവരാണ് തട്ടിപ്പിനിരയാകുന്നത്. മണി പേയ്‌മെന്റ് ആപ്പുകളിലൂടെ പണമിടപാട് നടത്തുന്നവരും ഓൺലൈനായി ബില്ലുകൾ അടക്കുന്നവരും ഫുഡ് ഡെലിവറി ആപ്പുകൾ ഉപയോഗിക്കുന്നവരുമാണ് കൂടുതലും തട്ടിപ്പിനിരയാകുന്നതെന്ന് പൊലീസിന്റെ മുന്നറിയിപ്പ് സന്ദേശത്തിൽ പറയുന്നു.
യഥാർത്ഥ വെബ്‌സൈറ്റുകളോട് കിടപിടിക്കുന്ന രീതിയിലായണ് വ്യാജ സൈറ്റുകൾ ഉണ്ടാക്കുന്നത്. വ്യാജ വെബ്‌സൈറ്റുകൾ ഗൂഗിളിൽ ആദ്യം ലിസ്റ്റ് ചെയ്യുന്ന രീതിയിൽ തയ്യാറാക്കിയാണ് തട്ടിപ്പ് സംഘം പ്രവർത്തിക്കുന്നത്. ഔദ്യോഗിക വൈബ്‌സൈറ്റുകളിൽ നിന്ന് ലഭിക്കുന്ന കസ്റ്റമർ കെയർ നമ്പറുകളിൽ വിളിക്കാൻ ശ്രമിക്കണമെന്നും ആർക്കും ബാങ്ക് അക്കൗണ്ട് വിവരങ്ങളോ രഹസ്യവിവരങ്ങളോ ഫോണിൽ ലഭിച്ച സന്ദേശങ്ങളോ അയച്ചു നൽകരുതെന്നും പൊലീസ് മുന്നറിയിപ്പ് നൽകുന്നു. ഔദ്യോഗിക സൈറ്റുകളിൽ കയറി മാത്രം കസ്റ്റമർ കെയർ നമ്പറുകൾ, ഇമെയിൽ വിലാസങ്ങൾ എന്നിവ ശേഖരിക്കണമെന്നും നിർദേശമുണ്ട്.
