പാറക്കടവ് : പാറക്കടവ് കെയർ & ക്യൂയർ ഹോസ്പിറ്റലിന് സമീപം ബുള്ളറ്റ് ബൈക്കിന് തീപ്പിടിച്ചു. ഇരിങ്ങണ്ണൂർ സ്വദേശി സൗപർണികയിൽ ഹരിദാസിന്റെ ബൈക്കിനാണ് തീപ്പിടിച്ചത്. ഇന്ന് ഉച്ചയ്ക്ക് ഒരുമണിയോടെയാണ് സംഭവം.

ഹരിദാസനും ഭാര്യയും ആശുപത്രിയിലെത്തി തിരിച്ച് പോകുന്നതിനായി ബൈക്ക് സ്റ്റാർട്ട് ചെയ്യുമ്പോഴാണ് തീ ഉയർന്നത്. നിമിഷ നേരം കൊണ്ട് തീ ആളിപ്പടർന്നു. സമീപത്തുണ്ടായിരുന്നവർ ഉടൻ ഫയർ സ്റ്റേഷനിൽ വിവരം അറിയിച്ചു. നാദാപുരം ഫയർ &റെസ്ക്യൂ സ്റ്റേഷൻ ഓഫീസർ വരുൺ. എസ്, സീനിയർ ഫയർ ഓഫീസർ ഐ ഉണ്ണികൃഷ്ണൻ എന്നിവരുടെ നേതൃത്വത്തിൽ ഫയർ ഫോഴ്സ് യൂണിറ്റ് സ്ഥലത്തെത്തി.

നാട്ടുകാരും ഫയർഫോഴ്സും ചേർന്ന് ഉടൻ തീ അണച്ചു. ഷോട്ട് സർക്യൂട്ടാണ് തീപ്പിടത്തിന് കാരണമെന്നാണ് പ്രാഥമിക നി​ഗമനം. ഭാ​ഗ്യം കൊണ്ടാണ് ദമ്പതികൾ അപകടത്തിൽ നിന്നും രക്ഷപ്പെട്ടത്.