സര്‍വ്വീസ് റോഡുകളില്‍ വാഹനങ്ങള്‍ കുടുങ്ങിക്കിടക്കുന്നു; ദേശീയപാതയില്‍ മൂരാട് വന്‍ഗതാഗതക്കുരുക്ക്
പയ്യോളി: ദേശീയപാതയില്‍ ഇരിങ്ങല്‍ മൂരാട് വന്‍ ഗതാഗതക്കുരുക്ക്. കണ്ണൂര്‍ഭാഗത്തേക്കും കോഴിക്കോട് ഭാഗത്തേക്കും പോകുന്ന സര്‍വ്വീസ് റോഡുകളില്‍ വാഹനങ്ങള്‍ ഏറെ നേരമായി കുടുങ്ങിക്കിടക്കുകയാണ്. കോഴിക്കോട് ഭാഗത്തേക്ക് പോകേണ്ട സര്‍വ്വീസ് റോഡില്‍ കെ.എസ്.ആര്‍.ടി.സി ബസ് തകരാറിലായതിനെ തുടര്‍ന്നാണ് ഗതാഗതക്കുരുക്കുണ്ടായത്.
ഈ കുരുക്കില്‍ നിന്ന് രക്ഷപ്പെടാനായി കണ്ണൂര്‍ ഭാഗത്തുനിന്നും കോഴിക്കോട് ഭാഗത്തേക്ക് പോകേണ്ട സ്വകാര്യ ബസുകള്‍ നിരതെറ്റിച്ച് കണ്ണൂര്‍ ഭാഗത്തേക്കുള്ള വാഹനങ്ങള്‍ പോകേണ്ട സര്‍വ്വീസ് റോഡിലൂടെ കയറ്റി. ഇതിന് പിന്നാലെ ചില ലോറികളും ഇതുവഴി കടന്നതോടെ ഈഭാഗത്തും ഗതാഗതക്കുരുക്കായി.
പൊലീസ് സ്ഥലത്തെത്തി കുരുക്ക് ഒഴിവാക്കാനുള്ള ശ്രമങ്ങള്‍ നടത്തുന്നുണ്ട്. ദേശീയപാതയില്‍ സര്‍വ്വീസ് റോഡുകള്‍ക്ക് വേണ്ടത്ര വീതിയില്ലാത്തത് ഭാവിയില്‍ വലിയ ഗതാഗതക്കുരുക്കുകള്‍ വഴിവെക്കുമെന്ന ആശങ്ക ശരിവെക്കുന്നതാണ് ഇന്ന് മൂരാട് ഭാഗത്തുണ്ടായ ഗതാഗത പ്രശ്‌നം. സര്‍വ്വീസ് റോഡുകളില്‍ ഏതെങ്കിലും വാഹനങ്ങള്‍ കേടുപറ്റി കിടന്നാല്‍ അതുവഴി മറ്റുവാഹനങ്ങള്‍ക്ക് കടന്നുപോകാന്‍ കഴിയാത്ത സ്ഥിതിയാണ്. കേടുവന്ന വാഹനങ്ങള്‍ റോഡില്‍ നിന്ന് മാറ്റുംവരെ മറ്റുവാഹനങ്ങള്‍ കടന്നുപോകാന്‍ പ്രയാസപ്പെടും.