കോഴിക്കോട് : പോലീസിനു നേരെ വടിവാൾ വീശി പോലീസ് വാഹനം അക്രമിച്ച കേസിലും പിടിച്ചുപറി, ട്രെയിനിൽ മോഷണം തുടങ്ങി മറ്റ് നിരവധി കേസുകളിലും പ്രതിയായ യുവാവിനെ കാപ്പചുമത്തി നാടുകടത്തി. നടക്കാവ് തായാടി നിലം പറമ്പിൽ ക്രിസ്റ്റഫർ എം കെയാണ് നാടുകടത്തിയത്. രാത്രി നഗരത്തിലെ വിവിധ സ്ഥലങ്ങളിൽ വഴിയാത്രക്കാരുടെ പണവും മൊബൈൽ ഫോണും മറ്റു വിലപിടിപ്പുള്ള മുതലുകളും തട്ടിപ്പറിച്ച കേസ്, ട്രെയിനിൽ കളവ് നടത്തൽ, പൊതു സ്ഥലത്ത് കലഹമുണ്ടാക്കി ആളുകളെ കല്ല്, ബ്ലേഡ് , കുപ്പി എന്നിവ കൊണ്ട് മരണംവരെ സംഭവിക്കാവുന്ന തരത്തിൽ ദേഹോപദ്രവം ഏല്പിക്കൽ തുടങ്ങി നിരവധി കേസുകൾ ഇയാൾക്കെതിരെയുണ്ട്.

കോഴിക്കോട് കസബ, നടക്കാവ് റെയിൽവേ പോലീസ് എന്നിവിടങ്ങളിൽ നിരവധി കേസുകളിൽപ്പെട്ട കൊടും കുറ്റവാളിയാണ് ക്രിസ്റ്റഫർ. കോഴിക്കോട് സിറ്റി പോലീസ് കമ്മീഷണർ സമർപ്പിച്ച റിപ്പോർട്ടിൻെറ അടിസ്ഥാനത്തിൽ കണ്ണൂർ റേഞ്ച് ഡെപ്യൂട്ടി ഇൻസ്പെക്ടർ ജനറൽ ആണ് ഉത്തരവ് പുറപ്പെടുവിച്ചത്. ഒരു വർഷക്കാലത്തേക്കാണ് നാടുകടത്തിയത്.