സംശയം തോന്നി ചാക്ക് പരിശോധിച്ചപ്പോൾ നട്ടും ബോൾട്ടും; കൊയിലാണ്ടി മൂടാടി റെയിൽവേ ഗേറ്റിന് സമീപത്ത് നിന്നും പട്ടാപ്പകൽ മോഷ്ടാക്കളെന്ന് കരുതുന്ന രണ്ട് പേരെ നാട്ടുകാർ പിടികൂടി പോലീസിൽ ഏൽപ്പിച്ചു
കൊയിലാണ്ടി: മൂടാടി റെയിൽവേ ഗേറ്റിന് സമീപത്ത് നിന്നും മോഷ്ടാക്കളെന്ന് കരുതുന്ന രണ്ട് പേരെ നാട്ടുകാർ പിടികൂടി. ഇന്ന് രാവിലെ 9.30ഓടെയാണ് സംഭവം. റെയിൽവേ ഗേറ്റിന് സമീത്തായി പണി നടന്നുകൊണ്ടിരിക്കുകയാണ്. ഇവിടെ നിന്നുമുള്ള നട്ടും ബോൾട്ടും രണ്ട് പേർ ചാക്കിൽ കയറ്റി ഓട്ടോറിക്ഷയിൽ കയറ്റി വെക്കുന്നത് കണ്ട് സംശയം തോന്നിയ ഒരാളാണ് വിവരം നാട്ടുകാരെ അറിയിക്കുന്നത്.
തുടർന്ന് സമീപപ്രദേശത്തുള്ളവർ എത്തി പരിശോധിച്ചപ്പോൾ ചാക്കിൽ നട്ടും ബോൾട്ടും, മറ്റൊരാളുടെ കൈയിൽ കുറച്ച് വയറുകളും കണ്ടെത്തി. സംഭവത്തെ കുറിച്ച് ചോദിച്ചപ്പോൾ രണ്ട് പേരും പരസ്പരവിരുദ്ധമായ മറുപടികൾ പറഞ്ഞതോടെ നാട്ടുകാർക്ക് സംശയം തോന്നി കൊയിലാണ്ടി പോലീസിൽ വിവരം അറിയിച്ചു.

പോലീസ് സ്ഥലത്തെത്തി രണ്ട് പേരെയും കസ്റ്റഡിയിലെടുത്തു. മോഷ്ടാക്കളാണെന്ന് കരുതുന്ന ഒരാൾ പുൽപ്പള്ളിയിലാണെന്നും, മറ്റൊരാൾ കോഴിക്കോട് ആണെന്നുമാണ് നാട്ടുകാരോട് പറഞ്ഞത്.