കൊയിലാണ്ടി: കിണറിൽ വീണ പോത്തിനെ കൊയിലാണ്ടി അഗ്നിരക്ഷാസേന രക്ഷപ്പെടുത്തി. ഇന്ന് രാവിലെ 9.30ഓടെ ടൗണിൽ ബീച്ച് റോഡിൽ മുനഫർ ഹൗസിൽ സെയ്ദ് ജാഫർ എന്നയാളുടെ വീട്ടിലെ കിണറിലാണ് പോത്ത് വീണത്.

അഞ്ച് മീറ്റർ ആഴവും രണ്ട് മീറ്റർ വെള്ളവും ഉള്ള കിണറിൽ ഏതാണ്ട് അരമണിക്കൂറോളം പോത്ത് കിടന്നു. വീട്ടുകാർ വിവരം അറിയിച്ചതിനെ തുടർന്ന് കൊയിലാണ്ടി അഗ്നിരക്ഷാസേന ഉടൻ സ്ഥലത്തെത്തി. ഫയർ ആൻഡ് റെസ്ക്യൂ ഓഫീസർ നിധിപ്രസാദ് ഇ.എം കിണറിലിറങ്ങി സേനാംഗങ്ങളുടെ സഹായത്തോടുകൂടി റെസ്ക്യൂ റോപ്പ് ഉപയോഗിച്ച് പോത്തിനെ സുരക്ഷിതമായി കരക്കെത്തിച്ചു.

അപകടത്തിൽ പോത്തിന് പരിക്കുകളില്ല. ഗ്രേഡ് എ.എസ്.ടി.ഒ മജീദ് എമ്മിന്റെ നേതൃത്വത്തിൽ എഫ്ആർഒമാരായ രതീഷ് കെ എൻ, ജാഹിർ എം, നിതിൻരാജ് കെ, ഹോം ഗാർഡുമാരായ ഓംപ്രകാശ്, ബാലൻ ഇ.എം എന്നിവർ രക്ഷാപ്രവർത്തനത്തിൽ ഏർപ്പെട്ടു.