അഞ്ചു ഫോറും ഒരു സിക്സും, കൊയിലാണ്ടിക്കാരൻ രോഹന്റെ വെടിക്കെട്ട് ബാറ്റിംഗ്; സയിദ് മുഷ്താഖ് അലി ട്രോഫിയിൽ കേരളത്തിന് പത്ത് വിക്കറ്റ് വിജയം
കൊയിലാണ്ടി: പാഞ്ഞടുക്കുന്ന പന്തുകളെ വീശിയടിക്കാൻ രോഹന്റെ ബാറ്റുകൾ ഇത്തവണയും സജ്ജമായിരുന്നു. ഫോറുകളും സിക്സുകളും നേടി കൊയിലാണ്ടിയുടെ ബാറ്റിംഗ് വെടിക്കെട്ട് കായികലോകത്തിനു വീണ്ടും വിസ്മയമായി. സയ്യിദ് മുഷ്താഖ് അലി ട്രോഫിയില്‍ കേരളത്തിന് വിജയത്തുടക്കം. അരുണാചല്‍ പ്രദേശിനെതിരായ മത്സരത്തില്‍ പത്ത് വിക്കറ്റിനായിരുന്നു കേരളത്തിന്റെ ജയം.
ഇന്ന് രാവിലെ നടന്ന മത്സരം മഴ കാരണം 11 ഓവറാക്കി ചുരുക്കിയിരുന്നു. പാതി ഓവറു പോലും തികയ്ക്കുന്നതിനു മുൻപ് തന്നെ വിക്കറ്റൊന്നും നഷ്ടമാകാതെ കേരളം വിജയത്തിലേക്ക് ചുവടു വെച്ചു. ടോസ് നഷ്ടപ്പെട്ട് ബാറ്റിംഗിനെത്തിയ അരുണാചല്‍ ആറ് വിക്കറ്റ് നഷ്ടത്തില്‍ 53 റണ്‍സാണ് നേടിയത്. മറുപടി ബാറ്റിംഗില്‍ കേരളം 4.5 ഓവറില്‍ വിജയലക്ഷ്യം മറികടന്നു.
13 പന്തില്‍ 24 റൺസെടുത്ത് രോഹന്‍ കുന്നുമ്മേലും 16 പന്തില്‍ 24 റൺസെടുത്ത് വിവിഷ്ണു വിനോദും പുറത്താവാതെ നിന്നു. അഞ്ച് ഫോറും ഒരു സിക്സും അടങ്ങുന്നതായിരുന്നു രോഹന്റെ ഇന്നിംഗ്‌സ്. വിഷ്ണു ഒരു സിക്സും രണ്ട് ഫോറും നേടി. നേരത്തെ രണ്ട് വിക്കറ്റ് വീതം സിജോമോന്‍ ജോസഫ്, എസ് മിഥുന്‍ എന്നിവരുടെ പ്രകടനമാണ് അരുണാചലിനെ തകര്‍ത്തത്.
സഞ്ജു സാംസണ്‍ ദക്ഷിണാഫ്രിക്കക്കെതിരായ ഏകദിന പരമ്പരയില്‍ കളിക്കുന്നതിനാല്‍ഇന്നത്തെ മത്സരത്തില്‍ കളിക്കാനായില്ല. സഞ്ജുവിന്‍റെ അഭാവത്തില്‍ സച്ചിന്‍ ബേബി കേരളത്തെ നയിച്ചു.
ദോരിയ (18), തെച്ചി നെറി (12) എന്നിവര്‍ മാത്രമാണ് അരുണാചല്‍ നിരയില്‍ രണ്ടക്കം കണ്ടത്. മീറ്റ് ദര്‍പണ്‍ (1), അഖിലേഷ് സഹാനി (3), രോഹന്‍ ശര്‍മ (5), കംഷ യാങ്‌ഫോ (3)് എന്നിവരാണ് പുറത്തായ മറ്റുതാരങ്ങള്‍. തെംപോല്‍ (3), ചേതന്‍ ആനന്ദ് (1) എന്നിവര്‍ പുറത്താവാതെ നിന്നു. എന്‍ പി ബേസില്‍ ഒരു വിക്കറ്റ് വീഴ്ത്തി.
മുന്‍ ഇന്ത്യന്‍ താരം ടിനു യോഹന്നനാണ് കേരളത്തിന്റെ പരിശീലകന്‍. കഴിഞ്ഞ സീസണില്‍ കേരളത്തിനായി കളിച്ച ജലജ് സക്സേന ഇത്തവണ ടീമിലില്ല. ദുലീപ് ട്രോഫി ക്രിക്കറ്റ് ഫൈനൽ മത്സരത്തിൽ റൺ മഴ പെയ്യിച്ച് കളിപ്രേമികളിൽ ആവേശം കൊള്ളിച്ചിരുന്നു രോഹൻ. ടെസ്റ്റിൽ ഏകദിന ശൈലിയില്‍ ബാറ്റ് വീശിയ രോഹൻ ദുലീപ് ട്രോഫിയിൽ സെഞ്ച്വറി തികയ്ക്കുന്ന ആദ്യ കേരള താരമായി ചരിത്രവും കുറിച്ചിരുന്നു.
കേരളത്തിന്റെ മുഴുവന്‍ ടീം: സഞ്ജു സാംസണ്‍ (ക്യാപ്റ്റന്‍), രോഹന്‍ കുന്നുമ്മല്‍, വിഷ്ണു വിനോദ്, ഷോണ്‍ റോജര്‍, സച്ചിന്‍ ബേബി, അബ്ദുല്‍ ബാസിത്, കൃഷ്ണ പ്രസാദ്, മുഹമ്മദ് അസറുദ്ദീന്‍, സിജോമോന്‍ ജോസഫ്, എസ് മിഥുന്‍, വൈശാഖ് ചന്ദ്രന്‍, മനു കൃഷ്ണന്‍, ബേസില്‍ തമ്പി, എന്‍ പി ബേസില്‍, എഫ് ഫനൂസ്, ആസിഫ് കെ എം, എസ് സച്ചിന്‍.