‘പാവപ്പെട്ട പെൻഷൻകാർക്ക് അർഹമായ ആനുകൂല്യങ്ങൾ നിഷേധിക്കുന്നു’; പയ്യോളി സബ് ട്രഷറിക്ക് മുന്നിൽ കേരള സ്റ്റേറ്റ് പെൻഷനേഴ്‌സ് സംഘ് വടകര മേഖല കമ്മിറ്റിയുടെ ധർണ്ണ
പയ്യോളി: പയ്യോളി സബ് ട്രഷറിക്ക് മുന്നിൽ കേരള സ്റ്റേറ്റ് പെൻഷനേഴ്‌സ് സംഘ് വടകര മേഖല കമ്മിറ്റിയുടെ നേതൃത്തിൽ വിവിധ ആവശ്യങ്ങൾ ഉന്നയിച്ച് ധർണ നടത്തി. ധർണ്ണ സംസ്ഥാന വൈസ് പ്രസിഡണ്ട് എം.കെ. സദാനന്ദൻ ഉദ്ഘാടനം ചെയ്തു.
പി.എസ്.സി മെമ്പർമാർ, ഗവ. പ്ലീഡർമാർ, മന്ത്രിമാർ എം.എൽ.എമാർ എന്നിവർക്ക് വാരിക്കോരി കൊടുക്കാൻ ഫണ്ടുള്ള സർക്കാർ പാവപ്പെട്ട പെൻഷൻകാർക്ക് അർഹമായ ആനുകൂല്യങ്ങൾ പോലും നിഷേധിക്കുകയാണെന്നും ഇതിനെതിരെ പെൻഷൻകാർ ഒറ്റക്കെട്ടായി പ്രതിഷേധിക്കണമെന്നും അദ്ദേഹം പറഞ്ഞു.
ജില്ലാ വൈസ് പ്രസിഡണ്ട് പി. ഗോപാലൻ മാസ്റ്റർ അധ്യക്ഷത വഹിച്ചു. ജില്ലാ ജോയിന്റ് സെക്രട്ടറി പി. അനിൽകുമാർ, വിവിധ ബ്ലോക്ക് ഭാരവാഹികളായ ടി. ഭാസ്‌കരൻ, വി. രാജഗോപാലൻ, കെ. രാജൻ, കെ.വി ഗോപാലകൃഷ്ണൻ, പി. ബാലകൃഷ്ണൻ കെ. സുകുമാരൻ. പയ്യോളി ബ്ലോക്ക് സെക്രട്ടറി കെ. സഹദേവൻ എന്നിവർ സംസാരിച്ചു.