---

പേരാമ്പ്ര: ചങ്ങരോത്ത് പഞ്ചായത്തിലെ മഞ്ഞപ്പിത്ത രോ​ഗബാധിതരുടെ എണ്ണം കൂടുന്നു. രോ​ഗം സ്ഥിരീകരിച്ചവരുടെ എണ്ണം മുന്നൂറ് കവിഞ്ഞു. ആശുപത്രിയിൽ ചികിത്സയിലുള്ളവരുടെ എണ്ണം കുറവാണ്. വീടുകളിലാണ് ഭൂരിഭാ​ഗം പേരും ചികിത്സയിലുള്ളത്. ഓണാവധി കഴിഞ്ഞ് വടക്കുമ്പാട് ഹയർസെക്കണ്ടറി സ്കൂൾ തുറന്നിട്ടില്ല. പ്രതിരോധ പ്രവർത്തനത്തിന്റെ ഭാ​ഗമായാണ് സ്കൂൾ തുറക്കാത്തത്.

വടക്കുമ്പാട് ഹയർസെക്കണ്ടറി സ്കൂളിലെ വിദ്യാർഥികളാണ് കൂടുതലും മഞ്ഞപ്പിത്തം ബാധിച്ച് ചികിത്സയിലുള്ളത്. ഇതിൽ പ്ലസ് വൺ, പ്ലസ് ടു ക്ലാസുകളിലെ വിദ്യാർത്ഥികളിലാണ് കൂടുതലും മഞ്ഞപ്പിത്ത ബാധ സ്ഥിരീകരിച്ചിരിക്കുന്നത്. യു പി ക്ലാസുകളിലെ കുട്ടികളിൽ രോ​ഗ ബാധിതർ താരതമ്യേന കുറവാണ്. സ്കൂളിൽ ഇന്ന് ക്ലാസ് പി ടി എ വിളിച്ചു ചേർത്ത് രക്ഷിതാക്കൾക്ക് ബോധവത്ക്കരണ ക്ലാസ് നൽകിയിട്ടുണ്ട്.

സ്കൂൾ വീണ്ടും തുറക്കുന്ന അവസരത്തിൽ മുഴുവൻ വിദ്യാർത്ഥികൾക്കും വീടുകളിൽ നിന്ന് ഭക്ഷണവും തിളപ്പിച്ചാറിയ വെള്ളവും കൊടുത്തയക്കണമെന്ന് ആരോ​ഗ്യ പ്രവർത്തകർ രക്ഷിതാക്കൾക്ക് നിർദ്ദേശം നൽകി. താല്ക്കാലികമായി സ്കൂളിൽ ഭക്ഷണം പാചകം ചെയ്യുന്നത് ഒഴിവാക്കാനും നിർദ്ദേശമുണ്ട്. സ്കൂൾ പരിസരത്ത് സിപ്പപ്പ്, കൂൾ​ഡ്രിംങ്സ് തുടങ്ങിയവ വിൽക്കുന്നതിന് വിലക്കേർപ്പെടുത്തി.

പഞ്ചായത്തിൽ പ്രതിരോധ പ്രവർത്തനങ്ങൾ ഊർജ്ജിതമാക്കിയിട്ടുണ്ടെന്ന് ഹെൽത്ത് ഇൻസ്പെക്ടർ വടകര ഡോട് ന്യൂസിനോട് പറഞ്ഞു. രോ​ഗം ബാധിതരുടെ വീടുകളിലെ കിണറുകളെല്ലാം ക്ലോറിനേഷൻ നടത്തി. നാളെയും മറ്റന്നാളുമായി പഞ്ചായത്തിലെ എല്ലാ വീട്ടു കിണറുകളും സൂപ്പർ ക്ലോറിനേഷൻ നടത്തും. വീടുകൾ കയറിയിറങ്ങി വളണ്ടിയർമാർ ബോധവത്ക്കരണം നടത്തുന്നുണ്ടെന്നും ഹെൽത്ത് ഇൻസ്പെക്ടർ പറഞ്ഞു. രോ​ഗ വ്യാപനത്തിന്റെ ഉറവിടം കണ്ടെത്താൻ ഇതുവരെ സാധിച്ചിട്ടില്ല. സ്കൂളിലേയും പരിസരത്തെ കടകളിലേയും ഏതാനും വീടുകളിലേയും വെള്ളത്തിന്റെ സാമ്പിളുകൾ പരിശോധനയ്ക്ക് അയച്ചിട്ടുണ്ട്.