അഞ്ച് ദിവസത്തിനുള്ളില്‍ കൊല്ലുമെന്ന് ഭീഷണി; ചെമ്മരത്തൂരില്‍ ഭാര്യയെ ഭര്‍ത്താവ് വീട്ടില്‍ കയറി വെട്ടി പരിക്കേല്‍പ്പിച്ചു
വടകര: ചെമ്മരത്തൂരില്‍ ഭാര്യയെ ഭര്‍ത്താവ് വീട്ടില്‍ കയറി വെട്ടി പരിക്കേല്‍പ്പിച്ചു. പാലയാട്ട് മീത്തല്‍ അനഘ (27)യ്ക്കാണ് വെട്ടേറ്റത്. സംഭവത്തില്‍ ഭര്‍ത്താവ് കാര്‍ത്തികപ്പള്ളി ചെക്യോട്ടില്‍ ഷനൂബിനെ വടകര പോലീസ് കസ്റ്റഡിയിലെടുത്തു.
വെള്ളിയാഴ്ച വൈകിട്ട് അഞ്ചരയോടെയാണ് സംഭവം. ദാമ്പത്യപ്രശ്‌നങ്ങളെ തുടര്‍ന്ന് അനഘ ഭര്‍ത്യവീട്ടില്‍ നിന്നും ചെമ്മരത്തൂരിലെ സ്വന്തം വീട്ടിലേക്ക് വന്നിരുന്നു. ഇതിനിടെ അനഘയെ വക വരുത്തുമെന്ന് പറഞ്ഞ് കഴിഞ്ഞ ദിവസം ഷനൂബ് പലര്‍ക്കും ഓഡിയോ സന്ദേശം അയച്ചിരുന്നു.
ഇതിന് പിന്നാലെയാണ് വെള്ളിയാഴ്ച കത്തിയും കൊടുവാളുമായി എത്തി ഇയാള്‍ അക്രമം നടത്തിയത്. ഇരു കൈകള്‍ക്കും പരിക്കേറ്റ അനഘയെ വടകര ഗവ.ജില്ലാ ആശുപത്രിയില്‍ പ്രവേശിപ്പിച്ചു. അനഘയെ ഷനൂബ് ഉപദ്രവിക്കുന്നത് കണ്ട് രക്ഷിക്കാന്‍ ശ്രമിച്ച അമ്മൂമ്മ മാതുവിന് നിസാര പരിക്കുണ്ട്. അക്രമണ ശേഷം വീടിന് സമീപത്തെ ബസ് സ്റ്റോപ്പില്‍ നില്‍ക്കുകയായിരുന്ന ഷനൂബിനെ വടകര പോലീസ് കസ്റ്റഡിയിലെടുക്കുകയായിരുന്നു.
Description: In Chemmarathur, the husband hacked his wife and injured her