കൊടുവള്ളി: സൗദി ദേശീയ ഗെയിംസില്‍ കൊടുവള്ളി സ്വദേശിനിക്ക് സ്വര്‍ണ്ണ നേട്ടം. റിയാദില്‍ പ്രവാസിയായ ഖദീജ നിസ ആണ് മത്സരത്തില്‍ സ്വര്‍ണമെഡല്‍ ജേതാവായത്. വനിതാ സിംഗിസ് ബാഡ്മിന്റണ്‍ മത്സരത്തില്‍ സൗദി താരങ്ങളെ പരാജയപ്പെടുത്തിയായിരുന്നു ഖദീജയുടെ മിന്നും ജയം. 2 കോടി 20ലക്ഷം രൂപ ക്യാഷ് പ്രൈസായി ലഭിക്കും.

അല്‍ നജദ് ക്ലബിനെ പ്രതിനിധീകരിച്ച് കളത്തിലിറങ്ങിയ ഖദീജ നിസ മൂന്ന് ദിവസങ്ങളിലായി നടന്ന ആറ് മത്സരങ്ങളിലും വിജയം കരസ്ഥമാക്കി. വ്യാഴാഴ്ച നടന്ന ഫൈനല്‍ മത്സരത്തില്‍ അല്‍ ഹിലാല്‍ ക്ലബിലെ ഹയ അല്‍ മുദരയ്യയെ 21-11, 21-10 സ്‌കോറിനാണ് പരാജയപ്പെടുത്തിയതോടെ വിജയം സുനിശ്ചിതമായി.

സൗദിയില്‍ ആദ്യമായി നടന്ന ദേശീയ ഗെയിംസില്‍ സൗദിയില്‍ താമസിക്കുന്ന വിദേശികള്‍ക്കും പങ്കെടുക്കാന്‍ അവസരം ലഭിച്ചതോടെയാണ് ഖജീദ മത്സരത്തിനിറങ്ങിയത്. ദേശീയ ഗെയിംസില്‍ പങ്കെടുക്കുന്ന ഏക ഇന്ത്യക്കാരിയാണെന്ന പ്രത്യേകത കൂടി ഖദീജ നിസയ്ക്കുണ്ട്. റിയാദ് ന്യൂ മിഡില്‍ ഈസ്റ്റ് ഇന്റര്‍നാഷണല്‍ ഇന്ത്യന്‍ സ്‌കൂള്‍ പ്ലസ് വണ്‍ വിദ്യാര്‍ഥിനിയായ ഖദീജ ഐടി എഞ്ചിനീയര്‍ കൊടത്തിങ്ങല്‍ അബ്ദുല്ലത്തീഫിന്റെ മകളാണ്. സൗദി, ബഹ്റൈന്‍, ഇന്ത്യ എന്നിവിടങ്ങളില്‍ നടന്ന നിരവധി ബാഡ്മിന്റണ്‍ മത്സരങ്ങളിലും ഖദീജ നിസ തന്റെ കഴിവ് തെളിയിച്ചിട്ടുണ്ട്.

summary: Gold medal for Koduvalli girl in Saudi National Games